Bas prokýratýra Qostanai oblysyndaǵy órtke bailanysty 3 qylmystyq is qozǵady, dep habarlaidy "Ult aqparat".
«Qostanai oblysynyń Áýliekól, Uzynkól jáne Qarabalyq aýdandarynda tabiǵi órtti sóndirý jalǵasyp jatyr. Aldyn ala málimetter boiynsha, tórt eldimekende (Amanqaraǵai aýyly, Ozernoe, Kalinin jáne Lesnoe) 108-ge jýyq turǵyn úi men ǵimarat zardap shekti. Keltirilgen zalal mólsheri anyqtalyp jatyr.
Búginde Amanqaraǵai aýylynyń turǵyny - 1936 jyly týǵan M.I. Babenkonyń qaza tapqany belgili.
Sonymen qatar, 3 qyrkúiekte Qostanai qalasynda «Orýjeinaia palata» ańshylyq dúkeni órtengen. Sonyń saldarynan dúkenniń jeti qyzmetkeri zardap shegip, úsheýi kúiik shalyp aýrýhanaǵa jatqyzyldy, al tórteýi qaza tapty», - dep jazylǵan Bas prokýratýranyń baspasóz qyzmeti taratqan málimette.
Atalǵan faktiler boiynsha Qylmystyq kodekstiń 204-babynyń 2-bóligi (otpen abaisyz jumys isteý arqyly aýyr zardaptarǵa ákep soqqan nemese asa iri zalal keltirilgen is-áreket), 341-babynyń 1-bóligi (ormandardy joiý), 292-babynyń 3-bóligi (abaisyzda eki nemese odan da kóp adamnyń ólimine ákep soqqan órt qaýipsizdigi talaptaryn buzý) boiynsha sotqa deiingi tergep-tekserý áreketteri bastaldy.
«Adamdardyń qaza bolǵanyn, zardap shekkenderdiń sanyn jáne órt saldarynan keltirilgen shyǵyndy eskere otyryp, qylmystyq ister Bas prokýratýranyń jáne Qostanai oblysy prokýratýrasynyń arnaiy prokýrorlary basshylyq etetin tájiribeli quqyq qorǵaý jáne arnaýly organdar qyzmetkerlerinen qurylǵan tergeý-jedel toptardyń is júrgizýine qabyldandy. Tergeý barysy Bas prokýrordyń jeke baqylaýyna alyndy», - delingen habarlamada.
