Qazaqstan Respýblikasy Bas prokýrorynyń orynbasary B. B. Dembaev qazaqstandyqtarǵa úndeý jasady, dep habarlaidy "Ult aqparat".
Vedomstvo málimetinshe, 2022 jyldyń aqpanynan bastap buqaralyq aqparat quraldary men áleýmettik jelilerde Resei Federatsiiasy men Ýkraina arasyndaǵy qaqtyǵysqa qatysty materialdar (jariialanymdar, beinesiýjetter, habarlamalar, pikirler) belsendi jariialanyp jatyr.
"Bul rette olardyń ishinen jekelegenderi Qazaqstan azamattaryn osy janjalǵa qatysýǵa shaqyrýlar, ulttyq arazdyqty qozdyrý, eki taraptyń da azamattarynyń ulttyq ar-namysy men qadir-qasietin qorlaý belgileri bar qasaqana arandatýshylyq málimdemeler jáne kórineý jalǵan aqparatpen súiemeldenedi.
Budan bólek, áleýmettik jelilerdiń keibir paidalanýshylary, sonyń ishinde Qazaqstan azamattarynyń arasynan bolyp jatqan oqiǵalarǵa jariia túrde túsindirme bere otyryp, olarǵa elimizdiń aýmaǵy tutastyǵyna qatysty separatistik úndeýlerdi ornalastyryp jatyr", - delingen habarlamada.
Bas prokýrordyń orynbasary Dembaev Bolattyń aitýynsha, bul áreketterge Qazaqstan Konstitýtsiiasy, bizdiń elimiz qatysýshy sanalatyn jalpyǵa tanylǵan halyqaralyq-quqyqtyq qujattar boiynsha tyiym salynǵan.
"Qoǵamdyq qaýipsizdikti qamtamasyz etý, azamattardyń quqyqtary men bostandyqtaryn qorǵaý, qoǵamdyq-saiasi jaǵdaidyń turaqsyzdanýyna jol bermeý maqsatynda buqaralyq aqparat quraldary men áleýmettik jelilerde osyndai arandatýshylyq sózder men shaqyrýlarǵa berilmeýge shaqyramyz.
Qazaqstan azamatynyń shet memleket aýmaǵyndaǵy soǵys qimyldaryna qasaqana quqyqqa qaishy qatysýy, sol siiaqty ulttyq alaýyzdyqty qozdyrýǵa baǵyttalǵan qasaqana is-áreketter, buqaralyq aqparat quraldaryn nemese telekommýnikatsiia jelilerin paidalana otyryp, Qazaqstannyń tutastyǵyn, onyń aýmaǵyna qol suǵylmaýyn jáne bólinbeýin buzýǵa jariia túrde shaqyrý qylmystyq jazalanatyn áreket sanalatynyn (QK-niń 172, 174, 180-baptary) jáne 10 jylǵa deiin bas bostandyǵynan aiyrýǵa ákep soqtyratynyn túsindiremiz", - dedi bas prokýrordyń orynbasary Dembaev Bolat.
Sonymen qatar, Qazaqstan Respýblikasy Qylmystyq kodeksiniń 274-babyna sáikes, qoǵamdyq tártipti buzý nemese azamattardyń nemese uiymdardyń quqyqtary men zańdy múddelerine ne qoǵamnyń nemese memlekettiń zańmen qorǵalatyn múddelerine, onyń ishinde buqaralyq aqparat quraldaryn nemese telekommýnikatsiia jelilerin paidalana otyryp, eleýli ziian keltirý qaýpin týǵyzatyn kórineý jalǵan aqparat taratqany úshin jeti jylǵa deiin bas bostandyǵynan aiyrý kózdelgenin eskertemiz, delingen habarlamada.
"Osy negizinde, azamattardy jáne buqaralyq aqparat quraldaryn, áleýmettik jelilerdi paidalanýshylardy joǵaryda keltirilgen kez kelgen quqyq buzýshylyqtardy jasaýdan aýlaq bolýǵa, osyndai arandatýshylyq sózder men shaqyrýlarǵa jol bermeýge jáne olardyń aldyn alýǵa shaqyramyz", - dedi vedomstvo ókili.
