Sýret: primeminister.kz
Abai oblysyndaǵy orman órtine bailanysty qozǵalǵan qylmystyq is aiasynda joǵary laýazymdy tulǵalardan jaýap alynady. Bul týraly Bas prokýrordyń orynbasary Jandos Ómiráliev málimdedi, dep habarlaidy Sputnik Qazaqstan.
Májilis kýlýarynda jýrnalister Ómirálievten "Abai oblysyndaǵy orman órtine bailanysty qansha qylmystyq is qozǵaldy jáne osy qylmystyq isterde burynǵy tótenshe jaǵdailar ministri Iýrii Ilin, Abai oblysynyń ákimi Nurlan Uranhaev, Shyǵys Qazaqstan oblysynyń ákimi Danial Ahmetov, ekologiia jáne tabiǵi resýrstar ministri Zýlfiia Súleimenovanyń statýstary qandai?" dep surady.
"Semei ormany" rezervatyndaǵy aýqymdy órt boiynsha Qylmystyq kodekstiń 292-baby 3 bóligi boiynsha qylmystyq is qozǵaldy. Prezidenttiń tikelei tapsyrmasymen atalǵan qylmystyq istiń tergelýi Bas prokýratýraǵa júkteldi. Bas prokýratýra tarapynan quqyq qorǵaý organdarynyń eń bilikti tergeýshileri men jedel ýákilderin tarta otyryp, tiisti vedomstvoaralyq tergeý toby quryldy. Qazir tergeý toby Abai oblysynda, órt bolǵan jerde jumysyn bastap ketti", - dedi Ómiráliev.
Aitýynsha, órttiń saldaryn jáne qorshaǵan ortaǵa eleýli ziianyn eskerip, eń bastysy 14 azamattyń qyzmettik boryshyn óteý barysynda qaza tapqanyna bailanysty "qyzmetine nemqurailylyqpen qaraý" babymen qosymsha qylmystyq is qozǵaldy. Bul isti de Bas prokýratýra tergep jatyr.
"Is aiasynda óz qyzmetine salǵyrt ne jaýapsyz qaraǵan, aýyr zardaptarǵa jol bergen barlyq laýazym ieleri qylmystyq jaýapqa tartylady. Ázirge bul qylmystyq is boiynsha eshkimniń is-áreketi áli saralanǵan joq. Tergeýdiń bastalǵanyna shamaly ǵana kún ótti. Sol sebepti bul jerde qylmystyq is boiynsha laýazym ielerinde áli statýs joq", - dedi Ómiráliev.
Bul rette BAQ ókilderi "atalǵan laýazymdy tulǵalardan jaýap alyndy ma?" dep surady.
"Jaýap alynýǵa tiis tulǵalardyń kóbi, ol jerde tek basshylyq quram ǵana emes, orta býyndaǵy basshylyq quram da bar, órtti sóndirý jumystaryna qatysyp jatyr. Sol sebepti biz olardy qazir mazalap jatqan joqpyz. Olardan mindetti túrden jaýap alynady. Qazir basqa tergeý sharalary júrgizilip jatyr", - dedi Bas prokýrordyń orynbasary.
Qylmystyq isti tergeý eki aiǵa sozylady.
