QR Bas prokýratýrasy janyndaǵy Quqyq qorǵaý organdary akademiiasynyń rektory Erǵali Merzadinov «Bolashaq» baǵdarlamasyn ózgertýdi usynyp otyr, dep xabarlaidy QazAqparat tilshisi.
Onyń oiynsha, quqyq qorǵaýshylardy daiarlaý jaǵynan birqatar ózgeristerdi engizgen jón. Sebebi qazirgi júieniń tiimdiligi tómen, shetelde oqyp kelgen mamandarǵa suranys joq.
«Máselen, 25 jyldyń ishinde «Bolashaq» baǵdarlamasy boiynsha 47 qyzmetker daiyndyqtan ótti. Olardyń basym bóligi azamattyq jáne xalyqaralyq quqyq salasynda bilim aldy. Biraq quqyq qorǵaýshylar arasynda dál osy mamandarǵa suranys tómen. Bizdińshe, quqyq qorǵaý júiesine qandai mamandyqtar qajet, sony alǵanymyz durys. Al úmitkerlerdi akademiianyń ózi iriktep otyrýy qajet. Olardy naqty óziniń jumys salasy boiynsha jibergen durys», - dedi E.Merzadinov Bas prokýratýranyń alqa májilisinde.
Akademiia basshysynyń aitýynsha, qazirgi eki jyldyq oqýdy jartyjyldyq taǵylymdamamen almastyrý qajet.
«Alǵashqy eki aida olardy akademiiada oqytý kerek. Osy jumysqa sheteldik mamandardy da tartýǵa bolady. Ary qarai tórt ailyq taǵylymdamany shetelde jalǵastyrǵan durys. Osynyń arqasynda biýdjettiń biraz qarajatyn únemdeýge bolady. Al sheteldik mamandardy tartýdyń arqasynda óz oqytýshylarymyzdyń biliktiligin arttyra alamyz», - dep atap kórsetti E.Merzadinov.
Aita keteiik, alqa májilisi kezinde akademiia basshysy atalǵan oqý ornynyń kemshin tustaryn jariialady. Onyń aitýynsha, akademiia qyzmetkerleriniń kásibi daiyndyǵyn jan-jaqty tekserip shyǵý qajet. Sebebi mamandardyń aýysýy jiilep ketti. Úsh jyldyń ishinde atalǵan kórsetkish 60 protsentti qurady. «Eńbek tártibi osal. Árbir ekinshi qyzmetker «bolnichnyida» júrdi. Al keibir qyzmetkerler bir jylda eki ret emes, 8-10 ret «aýyryp» shyǵady. Bunyń barlyǵy kúndelikti nársege ainaldy. Sosyn akademiiada úsh jyl istese, kiretin esikti de bilmeitin qyzmetkerler bar», - dep atap kórsetti E.Merzadinov.
