Qazaqstan musylmandary dini basqarmasynyń tóraǵasy,
Bas múfti Erjan qajy MALǴAJYULYNYŃ
qasietti Ramazan aiyna bailanysty halyqqa
ÚNDEÝI
Asa qamqor, erekshe Meiirimdi Allanyń atymen bastaimyn!
Qurmetti otandastar!
Barshańyzǵa qasietti ramazan aiynyń qarsańynda jyl saiynǵy dástúrli úndeýimdi joldaimyn!
Ózderińizge belgili, elimizdiń Aqtóbe, Aqmola, Soltústik Qazaqstan oblystaryndaǵy otandastarymyz aityp kelmeitin tabiǵi sý tasqynynan edáýir zardap shekti. Qanshama baýyrlarymyzdyń úii sý astynda qalyp, materialdyq shyǵynǵa ushyrady. Osyǵan orai, jomart jandar men qaiyrymdy kásipkerler tabiǵi apattan úi-kúisiz sharasyz qalǵan turǵyndarǵa qoldaý kórsetip, kómegin aiamaýda.
Qazaqstan musylmandary dini basqarmasy da janashyr jamaǵattyń demeýshiligimen «Qaiyrymdylyq kerýeni» aktsiiasy aiasynda kiim-keshek, azyq-túlik, turmysqa qajetti buiymdar jetkizdi. Kásipker azamattardy osy baǵyttaǵy qaiyrymdylyq jumystarǵa belsene atsalysýǵa shaqyramyn.
Qadirli baýyrlar!
Asyl dinimiz Islamda «sadaqa jariia» degen qasietti uǵym bar. Qoǵamnyń, halyqtyń igiligi úshin jasalǵan saýapty isterdi, atap aitqanda, meshit-medrese, aýrýhana, bala-baqsha, sport keshenderin turǵyzý, kóshe, kópir salý, aýyzsýy joq aýyldarǵa sý tartyp, qudyq qazdyrtý, t.b igi amaldardy «sadaqa jariia» dep ataimyz. Mine, bul izgi is-sharalar halyqtyń igiligi úshin jasalǵan saýapty amaldar. Qazaqstan musylmandary dini basqarmasy oblystarda «Qaiyrymdylyq mekemesin» ashyp, jergilikti jas býynǵa dini hám zaiyrly bilim berip, imandylyqqa tárbieleýmen qatar turmysy tómen otbasylaryna áleýmettik kómek kórsetýde.
Metsenattar men kásipker azamattardy jalpy jurshylyqqa qajetti nysandardy turǵyzý jumysyna belsene aralasyp, janashyrlyq tanytýǵa shaqyramyn. Óitkeni, ramazan – qaiyrymdy jandar úshin mol múmkindikter maýsymy. Orazada jasalǵan árbir qaiyrly is – úlken saýap. Birde paiǵambarymyz Muhammedten (oǵan Allanyń salaýaty men sálemi bolsyn) bir kisi: «Ýa, Allanyń Elshisi, eń jaqsy adam kim?» – dep suraǵanda, ol: «Eń jaqsy adam – qoǵamǵa, elge paidasy tigen pende», – dep jaýap bergen eken.
Jýyrda Elbasymyz Nursultan Nazarbaev elimizdegi bai-dáýletti azamattardy jaǵdaiy tómen turǵyndarǵa kómek kórsetýge úndedi. Memleket basshysynyń bul bastamasyna ún qosý barshamyzdyń azamattyq boryshymyzǵa ainalýy qajet dep esepteimin.
Qurmetti qazaqstandyqtar!
Qoǵamda kisi aqysyn jeý, balany aiaýsyz urý, pedofilizm, náresteni dalaǵa tastaý, óz-ózine qol jumsaý, ajyrasý, keibir azamattar arasyndaǵy qatygezdik jaǵdailar, araq-sharapqa táýeldilik, otbasyndaǵy kelispeýshilik, terrorlyq oqiǵalar syndy jalpy adamgershilik qundylyqtarǵa jat áreketter kórinis tabýda. Pendeni rýhani turǵydan azdyryp, eldiń tynyshtyǵyn buzyp, qorshaǵan orta men búkil qoǵamnyń tutastyǵyna úlken ziianyn tigizetin mundai jaman áreketterge jurt bolyp jumylyp qarsy kúresýimiz kerek. Búgingidei birligimizdiń arqasynda mundai jaǵymsyz, jaman oqiǵalardyń jolyn kese alamyz.
Ardaqty aǵaiyn!
Ramazan – mol saýap jinaityn qasietti ai. Adam balasy izgi amaly arqyly Jaratýshynyń raqymyna, nyǵmetine keneledi. Jomart, janashyr azamattardy, kásipkerlerdi kómekke muqtaj adamdarǵa qamqorlyq kórsetýge, tabiǵi apat saldarynan buzylǵan úilerdi jóndeýge, jetim men jesirge meiirimdilik tanytyp, qaraýsyz qalǵan qarttarǵa kóńil bólýge shaqyramyn.
Zeket berý – jaǵdaiy kelgen (shariǵat boiynsha nisap mólsherine jetken) musylmanǵa paryz. Al zeket berekeli ramazan aiynda berilse, onyń da saýaby eselenip jazylady.
Qasietti aidyń qurmeti úshin azyq-túlik, kókónis pen turmystyq zattarǵa jeńildik jasalyp, Qudaiy astar men sadaqalar aýyzashar ýaqytynda uiymdastyrylsa, toilar ishimdiksiz ótkizilse, jamandyqtyń bastaýy bolǵan araq-sharaptyń satylýyna barynsha jol berilmese degen tilegimdi bildiremin. Osynaý jaqsy amaldar ramazannan keiingi ailarda da jalǵasyn tapsa nur ústine nur.
On eki aidyń sultany bolǵan qasietti ramazanda jasaǵan amaldarymyz ben izgi nietterimizdi Alla Taǵala qabyl etkei! Elimiz aman, jurtymyz tynysh, táýelsiz elimizdiń bolashaǵy jarqyn, árbir igi bastamalarymyz baiandy bolǵai! Áýmin!
(Eskertý: 2017 jyldyń 27-mamyry – qasietti Ramazan aiynyń birinshi kúni!)
