Asa qamqor, erekshe Meiirimdi Allanyń atymen bastaimyn!
Qadirli baýyrlar!
Barshamyzdy orazaǵa aman-esen jetkizgen qudireti sheksiz Alla Taǵalaǵa sansyz shúkirler men maqtaý-madaqtar bolsyn!
Sizderdi kúlli musylman qaýymy asyǵa kútken qasietti ramazan aiynyń kelýimen shyn júrekten quttyqtaimyn! Ár shańyraqqa shattyq pen baqyt, birlik pen bereke tileimin! Barshańyzǵa Jaratqan Iem jar bolsyn!
Bizdiń halqymyz ejelden ramazandy erekshe qasterlep: «On eki aidyń sultany», – dep ataǵan. Berekesi mol aida jaramazan jyryn aityp, orazanyń kelgenin qýanyshpen jetkizip, nasihattaǵan. Al aýyzashar dastarhany rýhani suhbattyń, bata men izgi tilektiń qainary bolǵan. Aýyz bekitken adamdy airyqsha qadirlep, oǵan aýyzashar berý – baǵzydan kele jatqan salt-dástúrimiz ben ádet-ǵurpymyz.
Tańǵy sáresi ár shańyraq úshin qýanyshty sát bolsa, keshki aýyzashar aǵaiyn men týysty, bir qaýym eldi imandylyqqa uiytqan, merekesi men berekesi úilesken basqosý bolatyn. Allaǵa shúkir, bul igi dástúr ǵasyrdan ǵasyrǵa jalǵasyp, jańǵyryp keledi.
Ramazan – raqym aiy! Qasietti aidyń qurmeti úshin bir-birin keshirip, meiirimdilik jolyn ustanǵan pendeler saýapqa keneledi. Ózgege meiirim kórsetken adamdy Alla Taǵala Óz meiirimine bóleidi. Keshirgenge – keshirim jasalady.
Ramazan – jaqsylyq aiy. Orazada jasalǵan árbir jaqsy amaldyń saýaby eselenip jazylady. Hadis-sharifte aitylǵandai, «adam balasynyń barlyq igi isteriniń saýaby artady. Árbir jaqsylyqqa on eseden jeti júz esege deiin saýap jazylady».
Osy rette otandastarymdy materialdyq kómekke muqtaj jandarǵa kóńil bólip, qaiyrymdylyq is-sharalarǵa belsendi túrde atsalysýǵa shaqyramyn. Kásipkerlerdi ramazannyń qurmeti úshin azyq-túlik, kókónis pen turmystyq zattarǵa, jol-kólik aqysyna jeńildikter jasaýǵa úndeimiz.
Qurmetti jamaǵat!
Qazaqstan musylmandary dini basqarmasy «2018 – Islam jáne otbasy jyly» dep atady. Qasietti aida qaraýsyz qalǵan qarttar men múgedekterge, jetimder men kópbalaly otbasylarǵa, naýqas adamdarǵa barynsha qamqorlyǵymyzdy kórseteiik, ardaqty aǵaiyn! Bir adamdy qýanyshqa bóleý – sadaqa.
Qudaiy astar men sadaqalar aýyzashar ýaqytynda uiymdastyrylsa, toilar ishimdiksiz ótkizilse, jamandyqtyń bastaýy bolǵan araq-sharaptyń satylýyna barynsha jol berilmese degen tilegimdi bildiremin.
Qurmetti qaýym!
On eki aidyń sultany – ramazan qutty, berekeli bolsyn! Qasietti aida jasaityn qulshylyq, duǵa-tilekterińiz qabyl bolsyn! Alǵa qoiǵan arman-maqsattaryńyz oryndalyp, orazadan orazaǵa aman-esen jete berýimizdi Alla násip etsin! Elimiz aman, jurtymyz tynysh, halqymyzdyń birligi nyǵaiyp, berekesi arta bergei! Táýelsizdigimiz árqashan baiandy bolǵai! Áýmin!
Bas múfti Serikbai qajy ORAZ
