Aýyzashardy úide berý men qorjynǵa salyp jetkizýdiń saýaby birdei. Bul týraly Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly aitty, dep habarlaidy "Ult aqparat".
«Oraza kezinde bárimiz Taraýyqqa, aýyzasharǵa úirenip qaldyq. Ókinishke qarai, Alla Taǵala bizge osyndai kezeńdi kórýdi jazypty. Endi bul kezeńnen de saqtyqpen, aqylmen, mádeniettilikpen ótýimiz kerek. Qazir qolymyzdan kelgenshe «oraza qorjyny» degen atpen aýyzashar berý tártibin nasihattap jatyrmyz. Elimizdiń birqatar óńiri qyzyl aimaqqa ótip, sary aimaqta da birneshe óńir bar. Sondyqtan saqtyq sharasyna nazar aýdaryp, oraza aýyzashardy barynsha jetkizip berý arqyly ótkizsek dep otyrmyz. Bul bir-birimizge degen qurmetimiz bolady», - dedi Naýryzbai qajy Taǵanuly Ortalyq kommýnikatsiialar qyzmetindegi brifing barysynda.
Bas múfti aýyzashardy jetkizip berý men úide ne dámhanada aýyzashar berýdiń saýaby birdei ekendigin basa aitty.
«Siz úide nemese ashanada aýyzashar berseńiz de, aýyzashardy qorjynǵa salyp, aýyz bekitken janǵa jetkizip berseńiz de saýaby birdei bolady. Aýyzashar berý súnnet, saýapty amal. Mindettelgen amal emes. Al adamnyń ómirin saqtaý, qorǵaý bizge buiyrylǵan mindetti amal sanalady», - dedi Bas múfti.
