60-tan asqan adamdar aýyz bekitýden buryn meditsinalyq tekserýden ótip, dárigerdiń tiisti keńesin alýy kerek. Bul týraly Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly aitty, dep habarlaidy QazAqparat.
«Ramazanda aýyz bekitken isi musylman balasy ózin iship-jeýden ǵana shektemei, jany men tánin jamandyqtan saqtap, izgilikke umtylady. Is-áreketin musylmanǵa tán ádep aiasynda oryndaýǵa tyrysady. Óitkeni Ramazan – kez kelgen izgi amaldy riiasyz nietpen jasaýǵa tárbieleitin, adamdy taqýalyqqa úiretetin ai. Ashtyq pen shólge tózip, Alla razylyǵyn alýdy shynaiy niet etken adamǵa beriletin syi men qurmet erekshe bolmaq.
Alla Taǵala Qudsi-hadiste: «Aýzy berik adam iship-jeýin Men úshin doǵardy. Oraza – Men jáne qulymnyń arasyndaǵy ǵibadat. Oǵan beriletin syidy Men ǵana ólshep, Men beremin. Aýzy berik qulymnyń ashtyq pen shóldeý sebebinen shyqqan aýyz iisi Men úshin misk átirinen de qaiyrly», – degen. Búginde Qazaqstan musylmandary dini basqarmasy halqymyzǵa «Ihsan ilimin» keńinen nasihattap keledi. Ihsan – pendeniń imanyn bekemdep, qulshylyqqa degen qulshynysyn arttyratyn, adamgershilikke tán igi qasietterdi kemeldendire túsetin rýhani ilim. Bul – ár amaldy kórkem túrde oryndaýǵa úiretetin ilim», - dedi Bas múfti Ortalyq kommýnikatsiialar qyzmetindegi brifing barysynda.
Osy rette Naýryzbai qajy Taǵanuly rýhani kemeldený aiy – Ramazanda barynsha ádepsiz áreket pen qate-kemshilikten arylyp, tula boiymyzda kórkem minez qundylyqtaryn qalyptastyrýǵa tyrysqanymyz abzal ekenin basa aitty.
«Ókinishke qarai, biyl da qasietti Ramazan aiyn pandemiia jaǵdaiynda ótkizgeli otyrmyz. Juqpaly dertti oqshaýlaný, saqtaný arqyly ǵana jeńýge bolatynyn anyq ańǵardyq. Osy rette sizderdi aýyzashar kezinde, qulshylyq sátterinde sanitarlyq talaptardy qatań saqtaýǵa shaqyramyn. Densaýlyq – bárinen qymbat qundylyq, Allanyń adamzatqa bergen amanaty. Osy oraida jasy 60-tan asqan aǵa-apalarymdy aýyz bekitýden buryn meditsinalyq tekserýden ótip, dárigerdiń tiisti keńesin alýǵa shaqyramyn. Egde jastaǵy jáne baliǵatqa tolmaǵan azamattardan kúrdeli ahýal turaqtalǵansha meshitke barmai, qulshylyqty úide oryndaýyn suraimyz», - dedi Qazaqstan musylmandary dini basqarmasynyń tóraǵasy.
