Berdibek Saparbaev jambyldyqtardyń dárigerler men dári-dármek tapshylyǵyna qatysty shaǵymdary boiynsha keńes ótkizdi, dep habarlaidy "Ult aqparat".
Jambyldyqtar jedel járdem men meditsinalyq mekemelerdiń jumysynyń nasharlyǵyna, aýrýhanalardaǵy tósek-oryndar men dárihanalardaǵy dári-dármekterdiń jetispeýshiligine qatysty jii shaǵymdanýda.
Osy oraida Jambyl oblysynyń ákimi Berdibek Saparbaev bas dárigerlermen, dárihana jelileriniń ókilderimen jáne distribiýtorlarmen kezdesý ótkizdi. Onda qalyptasyp otyrǵan jaǵdaidyń sebebi men qordalanǵan máselelerdiń sheshý joldary saralandy.
Oblystyq densaýlyq saqtaý basqarmasynyń basshysy Marat Jumanqulovtyń aitýynsha, provizorlyq statsionarlardaǵy tósek qorynyń toltyrylýy shamamen 50 paiyzdy quraidy. Ol dárigerler az bolǵandyqtan, naýqastardy qabyldaýǵa ýaqyttary jetpei otyrǵandyǵyn alǵa tartty.
Berdibek Saparbaev qabyldaý bólimindegi dárigerler sanyn kóbeitýdi tapsyrdy.
«Adamdar aýrýhanaǵa kelip, qabyldaý bóliminde birneshe saǵat kezek kútip otyrady. Naýqastarǵa barlyq qolaily jaǵdai jasaýdyń ornyna aýrýhanalar odan ári nasharlatady. Jaǵdaidy tez arada túzetý qajet», - dedi Berdibek Saparbaev.
Turǵyndar aýrýhanaǵa jatqyzylǵannan keiin de qajetinshe emdeý sharalaryn ala almaityndyqtaryna, dári-dármekterdiń jetispeýshiligine shaǵymdanýda.
«SK-Farmatsiia» JShS ókildiginiń basshysy Aijan Tortaevanyń aitýynsha, pnevmoniiamen aýyratyn naýqastardyń kóbeiýine bailanysty jýyrda 25,3 million teńgege shuǵyl dári-dármekter jetkizildi. Ol meditsinalyq uiymdardyń ótinishi boiynsha dári-dármekterdi jetkizýdi jalǵastyra beretinin aitty. Bul máseleni baqylaýda ustaý Marat Jumanqulovqa tapsyryldy.
Dárigerler naýqastarmen ǵana emes, sonymen birge olardyń týystarymen de bailanys ornata almaýda. Týystary dárigerlerden naýqastardyń jaǵdaiy týraly aqparat almaitynyn aitady. Bul turǵydaǵy shaǵym ýaqytsha provizorlyq statsionar bolyp jabdyqtalǵan oblystyq kópsalaly balalar aýrýhanasy dárigerleriniń ústinen túsken. Aýrýhananyń bas dárigeri Azat Sátjanov bul kemshilikter boiynsha jumystar atqarylǵanyn, dárigerlermen túsindirýler júrgizilgenin jetkizdi. Qazirgi ýaqytta aýrýhanada jedel ortalyq jumys isteidi.
«Bas dárigerler kabinette tyǵylyp otyrmai, shyǵyp, adamdarǵa qazirgi jaǵdaidy túsindirýi kerek. Sonymen qatar, qiyn jaǵdailardaǵy azamattardyń densaýlyǵyn saqtaý úshin shuǵyl naqty sharalar qabyldaýy tiis», - dedi aimaq basshysy.
Jiynda taǵy bir ózekti másele retinde jedel járdemniń kelý ýaqytynyń birneshe saǵatqa sozylatyndyǵy aityldy. Oblystyq meditsinalyq jedel járdem stantsiiasynyń bas dárigeriniń m.a. Ulpan Pyhybaevanyń aitýynsha, dispetcherlik qyzmettiń júktemesi eki esege artqan.
«Naýqas jedel járdem qyzmetin birneshe saǵat kútetin bolsa, onda kedergisiz meditsinalyq kómek týraly sóz aitýdyń ózi artyq shyǵar. Jedel járdem brigadalarynyń sanyn kóbeitý jáne olardyń jumysyn júieleý qajet», - dep tapsyrma berdi Berdibek Saparbaev.
Sondai-aq, oblys aýmaǵyndaǵy dárihanalarda virýsqa qarsy jáne qyzý túsiretin dárilerdiń jetispeýshiligi baiqalady. Dárihanalar jelisiniń ókilderi turǵyndardyń ózderi mundai ahýaldy qoldan jasap otyrǵandyǵyn tilge tiek etti. Dári-dármekti negizinen saý adamdar satyp alýda. Qazir olar distribiýtorlarmen jetkizýdiń jańa máselelerin talqylap jatqandyqtaryn aitady.
Berdibek Saparbaev densaýlyq saqtaý basqarmasy men taýarlar men qyzmetterdiń sapasy men qaýipsizdigin baqylaý departamentine halyq arasynda aqparattyq-túsindirý jumystary tiisti deńgeide júrgizilmegei otyrǵandyǵyn eskertti. Aimaq basshysy sondai-aq dárihana jelileriniń ókilderine baǵany shekti baǵadan joǵary kóterýge bolmaitynyn basa aitty.
Otyrysty qorytyndylai kele, Berdibek Saparbaev koronavirýs pandemiiasymen kúres júrip jatqan qazirgidei qiyn ýaqytta mundai olqylyqtarǵa jol berýge bolmaityndyǵyn atap ótti.
«Azamattarymyzdyń ómiri men densaýlyǵy – bárinen baǵaly. Biz olardy qorǵaý úshin bar kúsh-jigerimiz ben múmkindikterimizdi baǵyttaýymyz kerek», - dep túiindedi aimaq basshysy.
