Foto: hcbarys.kz
Qos azamattyǵy bar hokkeishi Dmitrii Shevchenko Qazaqstan azamattyǵynan aiyryldy, dep habarlaidy QazAqparat portaly.
Shaiba.kz saitynan málim bolǵanyndai, «Barys» hokkei klýby men Qazaqstan quramasynyń shabýylshysy Dmitrii Shevchenko jeltoqsan aiynyń basynda astanalyq komandaǵa qaita oralǵannan keiin Qazaqstan azamattyǵynan aiyrylǵan.
Jazda «Barys» basshylyǵyn ornynan bosatýdy talap etip, petitsiia uiymdastyrǵan jankúierlerdiń belsendi toby QR IIM Astana politsiia departamenti kóshi-qon basqarmasyna Dmitrii Edýardovich Shevchenkonyń (1995 jyly 15 jeltoqsanda týǵan, týǵan jeri – Shiokino qalasy, Týla oblysy, Resei Federatsiiasy, jumys isteitin jeri – «Barys» hokkei klýby) qos azamattyǵyn tekserý jóninde júgingen. Ótinishte sportshynyń Qazaqstan zańnamasyna qaishy keletin qos azamattyǵy bar ekendigi týraly dálelder keltirilgen.
Tekserý barysynda Qazaqstan azamaty Dmitrii Shevchenkonyń sheteldik memlekettiń (Resei Federatsiiasy) azamaty ekendigi anyqtaldy. «Qazaqstan azamattyǵy týraly» QR Zańynyń 21-baby 5-tarmaǵyna sáikes biylǵy 6 jeltoqsanda Dmitrii Shevchenkonyń Qazaqstan azamattyǵy joiyldy dep tirkeldi.
Azamattyǵy joq hokkeishi Qazaqstan quramasy sapynda halyqaralyq jarystarda oinai almaidy. Jankúierlerdiń belsendi toby Shaiba.kz saityna Qazaqstan azamaty bola tura, burynǵy azamattyǵynan bas tartpaǵan «Barys» pen el quramasynyń basqa da oiynshylaryna qatysty tekserý jóninde sondai ótinishter joldaitynyn habarlaǵan.
Astana politsiia departamenti kóshi-qon basqarmasynyń resmi jaýaby elektrondy kúiinde atalǵan saitqa túsken.
