Qazaqstan prezidenti ekinshi deńgeili bankterge bólýdi tapsyrǵan 600 milliard teńgeniń jartysy biryńǵai jinaqtaýshy zeinetaqy qorynan alynady. Bul týraly búgin qarjy ministri Álihan Smaiylov málimdedi, dep habarlaidy Sputnik Qazaqstan tilshisi.
Qazaqstan prezidenti 5 qazanda jasaǵan joldaýynda basymdyǵy bar jobalarǵa qoljetimdi nesie berý mindetin sheshý úshin Ulttyq bankke keminde 600 milliard teńge kóleminde uzaq merzimge qarjy bólýdi tapsyrǵan bolatyn. Búgin májiliste 2018 jylǵa arnalǵan respýblikalyq biýdjetti naqtylaý týraly zań jobasy tanystyrylǵannan keiin, qarjy ministri 600 milliard teńgeniń qaidan alynatynyn aitty.
"Bul suraqty Ulttyq bankke qoiǵan durys bolar edi. Biraq qarjy ministri retinde, meniń qolymda Ulttyq bank qarjynyń jartysyn BJZQ-dan, qalǵan jartysyn Ulttyq banktiń óz qarjysynan bólýdi josparlap otyrǵany týraly aqparat bar. Ol aqsha ekinshi deńgeili bankterge kommertsiialyq, naryqtyq mólsherleme boiynsha qaitarymdy negizde beriledi. Memleket basshysy aitqandai, bul qarajat ekonomika úshin basymdyqqa ie jobalarǵa bólinedi. Qazir biz qarjynyń maqsatty oryndalýyn, ekonomikamyz úshin basym baǵyttar men jobalarǵa baǵyttalǵanyn baqylaý tetikterin ázirleýimiz kerek",-dedi Smaiylov májilis kýlýarynda.
Onyń aitýynsha, zeinetaqy qoryndaǵy aqsha BJZQ aktivteriniń ósýi úshin investitsiialanyp, tabys ákelýi kerek.
"Sondyqtan olardy bir jaqqa investitsiialaý kerek. Bul tusta naryqtyq mólsherleme boiynsha el ekonomikasyna investitsiialaý týraly sóz bolyp otyr. Sondyqtan bul qalypty jaǵdai. Mundai praktika barlyq álem elinde qoldanylady", — dedi ministr.
