Bankterdiń azamattardyń turǵyn úiin óndirip alýdy qoldanýyna shekteý engiziledi. Bul jaiynda Senat depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat agenttigi.
«Memleket basshysynyń 2021 jylǵy 22 qyrkúiekte Mańǵystaý oblysyn áleýmettik-ekonomikalyq damytý jónindegi keńeste bergen tapsyrmasy boiynsha ipotekalyq qaryz alýshylardyń quqyqtaryn qorǵaýdy kúsheitý úshin Úkimet Ulttyq bankpen jáne Qarjy naryǵyn retteý jáne damytý agenttigimen birlese otyryp, atqarýshylyq is júrgizý, jeke sot oryndaýshysynyń jumysy, ekinshi deńgeidegi bankterdiń baǵalaý qyzmeti men kepildik saiasatyn retteý aiasynda qatynastardy jetildirý jónindegi zańnamalyq túzetýler toptamasyn ázirledi. Túzetýler Parlament Májilisinde qaralyp jatqan biýdjet zańnamasyn jetildirý máseleleri jónindegi zań jobasyna engizildi», - delingen Úkimet basshysynyń jaýabynda.
Premer-Ministrdiń jaýabyna sáikes, atqarýshylyq is júrgizý rásimderi aiasynda kepilge salynǵan múlikke óndirip alý qoldanylǵan kezde azamattardyń quqyqtaryn qorǵaýdy kúsheitý maqsatynda zań jobasynda mynalar kózdeledi:
- kreditorlar tarapynan josyqsyz áreketter men qyzmetterin asyra paidalanýlaryna jol bermeý úshin kreditordyń, onyń jumyskerleriniń jáne úlestes tulǵalardyń jyljymaityn múlikti ótkizý boiynsha saýda-sattyqqa qatysýyna tyiym salý jáne onda ekiden kem qatysýshy bolǵan jaǵdaida saýda-sattyq ótpedi dep taný;
- azamattardyń turǵyn úiine óndirip alýdy qoldanýdy shekteý úshin jeke tulǵanyń turǵyn úimen qamtamasyz etilgen ipotekalyq qaryzdary boiynsha oryndalmaǵan mindetteme somasynyń jáne kepilge salynǵan múlik qunyna merzimdi ótkizip alý kezeńiniń eleýsizdigi men mólsherles bolmaýynyń joǵary shegin engizý (oryndalmaǵan mindetteme somasy 10 paiyzdan 15 paiyzǵa deiin jáne merzimdi ótkizip alý kezeńi 3 aidan 6 aiǵa deiin);
- borysh júktemesin azaitý úshin boryshkerdiń kepilge salynǵan múlikti sottan tys, sol siiaqty sot arqyly ótkizý kezinde 3 ai merzimde óz betinshe ótkizý mindettiligi belgileý;
- turǵyn úidi tómendetilgen qunmen ótkizýge jol bermeý jáne ipotekalyq qaryzdar boiynsha oryndalmaǵan mindettemelerdi óteý úshin kepilge salynǵan múlikti ótkizýden alynǵan aqshanyń jetkiliktiligin qamtamasyz etýde kepil múlikti saýda-sattyqta satý baǵasynyń tómengi shegin bastapqy qunynyń 50-den 75 paiyzyna deiin arttyrý.
«Sonymen birge zań jobasynda kepil satylǵannan keiin blankilik bereshekti esepten shyǵarý negizderi keńeitildi. Túzetýlerdi eskere otyryp, ipotekalyq turǵyn úi qaryzy sharty boiynsha kepilge salynǵan jyljymaityn múlik sot tártibimen satylǵan jaǵdaida, boryshker-jeke tulǵada óndirip alýdy qoldanylýy múmkin ózge múlik nemese eń tómengi jalaqynyń 2 eselengen mólsherinen asatyn tabysy bolmaǵan kezde qalǵan bereshek esepten shyǵarylatyn bolady»,- dep atap ótedi Asqar Mamin.
