Senatta ótken Parlamenttik tyńdaýda Senat Tóraǵasy qarapaiym halyqqa bankter týraly qarapaiym tildegi aqparattyń jetimsizdigi týraly da syn aitty.
«Halyqtyń qarjylyq saýattylyǵyn arttyrý jumysyn jetildirý – ańyzdy másele. Sebebi jalpyǵa birdei túsinikti, qarapaiym tildegi qarjy salasyndaǵy aqparattyń jetispeýshiligi azamattar tarapynan tiimsiz sheshim qabyldaýǵa ákep soqtyrýda.
Sondai-aq qarjylyq qyzmetter túriniń kóbeiýi, olardyń kún sanap kúrdelenýi, alaiaqtyq tásilderdiń, qarjy piramidalarynyń óris alýy qarjy júiesine degen senimdi tómendetip otyr.
Ulttyq Bank joǵaryda atalǵan máselelerge keńinen kóńil bólip, qordalanǵan máselelerdiń ońtaily sheshimin tabý úshin ekinshi deńgeidegi banktermen keshendi jumystar júrgizýi qajet», - dedi Qasym-Jomart Toqaev.
Parlamenttik tyńdaý barysynda senator Muhtar Jumaǵaziev Ulttyq bank basshylyǵyna suraq qoidy:
«Kúndelikti baiqalyp júrgendei, Bankterdiń jái-kúii týraly tutynýshylarǵa túsinikti tilde jetkilikti habarlama jetkizilmeidi deýge bolady. Qazirgi ýaqytta Ulttyq bank saitynda berilip júrgen aqparatty tek mamandardyń ózi ǵana túsine alady.
Ár bank ózin rynokta aldyńǵy qatardamyz dep jarnamalaidy. Máselen, Astana Bankin alyp qarańyz. Eger onyń qyzmetin paidalanýshy bul banktiń aýyr halinen habardar bolǵan bolsa, qazirgidei tuiyqqa tirelmeý úshin basqa bankty tańdaǵan bolar edi.
Osyǵan bailanysty, Astana Banki qazir bastan keship otyrǵan aýyrtpalyqtar qansha ýaqytqa sozylady?
Taǵy bir másele: Qarjy ministrligi óziniń resmi saityna «azamattyq biýdjet» dep atalatyn biýdjet týraly barshaǵa jeńil túsiniletin aqparat ornalastyrǵan. Sol siiaqty Ulttyq bank te osyndai tájiribeni paidalanyp, jalpy jurtqa túsinikti etip, ekinshi deńgeidegi bankterdiń hal-jaiy týraly óziniń saitynda shynaiy aqparat ornalastyrýdy qarastyryp otyr ma?
Ádilbek Qaba
