Bank RBK-dan 144 milliard teńge jymqyrý isi boiynsha sottalǵan Jomart Ertaevtyń jazasy jeńildedi, - dep habarlaidy "Ult aqparat".
Apelliatsiia alqasy qaýlysyna sáikes Ertaev endi túrmede 11 jyl emes toǵyz jyl otyrýy tiis. Sot úkiminiń qalǵan bóligi ózgerissiz qalady.
Qazaq banki-niń burynǵy aktsioneri Baqyt Ibragimge de úkim shyqty. Segiz jylǵa bas bostandyǵynan aiyrý túrinde buryn taǵaiyndalǵan jaza jeti jylǵa deiin tómendetilgen.
Al Bank RBK basqarmasynyń eks-tóraǵasy, buryn segiz jylǵa bas bostandyǵynan aiyrylǵan Igor Majinovty jeti jylǵa sottap, múlkin tárkilegen.
"Oǵan qatysty bas bostandyǵyn shekteýdiń barlyq belgilengen merzimine probatsiialyq baqylaý belgilensin jáne oǵan sottalǵan adamnyń minez-qulqyn baqylaityn ýákiletti memlekettik organdy habardar etpesten, turaqty turǵylyqty jerin, jumys ornyn aýystyrmaý mindeti júktelsin", - delingen sot qaýlysynda.
Olardan basqa 18 sottalýshyǵa qatysty sońǵy úkim ózgertilgen. Olar: Edigenev, Batyrbaev, Igilman, Sadyqov, Barmenbekov, Abdraimova, Jaqýbaeva, Toishiev, Mamyrbekov, Ibraeva, Mámbetjanova, Mámbetov, Sháripov, Dáýletbekova, Agapov, Qusaiynov, Bektaev jáne Pak. Olardyń bárine naqty bas bostandyǵynan aiyrý jazasy shartty túrge almastyrylyp, qamaýdan bosatylǵan.
Eske salaiyq, buǵan deiin sottyń birinshi satysynda Bank RBK-dan 144 milliard teńge urlanǵany dáleldengen bolatyn. Tergeý derekterine súiensek, qylmys 2011-2017 jyldar aralyǵynda jasalǵan. Qylmystyq is 46 epizod jáne 700 tomnan turady. Aiyptaý aktisinde 3600-dan asa paraqsha bar.
