Bangladeshtegi Sýganda ózenindegi paromda bolǵan órt saldarynan kem degende 38 adam qaza tapty, dep habarlaidy QazAqparat Reuters agenttigine silteme jasap.
«Qazirgi kezde biz 38 adamnyń denesin anyqtadyq», - dedi Bangladesh ońtústigindegi keleńsiz jaǵdai oryn alǵan Djalokati aimaǵy órt sóndirý qyzmetiniń aǵa qyzmetkeri Kalam Hosein Bhýiian. Órt jergilikti ýaqytpen shamamen túngi saǵat 3-te bolǵandyǵy habarlanyp otyr.
Jalyn Djalokati arqyly Dakkadan Bargýnaǵa baǵyt alǵan paromnyń mashina bóliminen shyqqan.
Djalokati aýdanynyń ákimshisi Zohor Álidiń aitýynsha, qaza bolǵandar sany áldeqaida kóp bolýy múmkin, sebebi aýrýhanaǵa 50-den astam adam túsken. Keibir jolaýshylar iz-tússiz joǵalǵan dep eseptelýde, al keibireýleriniń jaǵdaiy óte aýyr.
Órttiń shyǵý sebebi anyqtalatyn bolady.
