Elimizde balyq sharýashylyǵymen ainalysýǵa qyzyǵýshylyq tanytqandarǵa memleketten qoldaý kórsetilýde, - dep habarlaidy "Ult aqparat".
Atap ketetin bolsaq, búgingi tańda bekire tuqymdas, tuqy jáne bahtah balyqtaryn ósirýge jem satyp alýǵa jumsalǵan qarajat kóleminiń 30% memleket sýbsidiialaýda.
Odan basqa, aýmaǵy 50 gektardan asatyn sý aidyndarynda taýarly balyq ósirýmen ainalysatyn kásipshilik sýbektilerine qural-jabdyqtardy satyp alýǵa ketken shyǵyndaryn 25% memleket sýbsidiia retinde qaitaryp beredi.
Aldaǵy ýaqytta memleket tarapynan jyly sýda mekendeitin balyq túrlerin, shaian tárizdilerdi ósirýge satyp alynǵan jemniń qarajatyn 30% qaitarý, al balyq shabaqtaryn, balyqtardyń atalyq-analyqtaryn kútýge, dárilik preparattar jáne biologiialyq negizdemeler ázirleýge jumsalǵan qarajattardyń 50% deiin sýbsidiialaý boiynsha qoldanystaǵy zańnamaǵa ózgerister engizilip jatyr.
Búgin osy jáne ózge de aýqymdy josparlar men atqarylyp jatqan jumystar Qapshaǵaida ótken jiynda talqylandy. Arnaiy shtab otyrysynda sala mamandary keshendi jospar quryp, sý aidyndarynda inspektorlar sanyn arttyryp, zańbuzýshylarǵa qatań sharalar qoldaný máselesin talqylady. Jiynǵa QR Ekologiia, geologiia jáne tabiǵi resýrstar ministrligi Balyq sharýashylyǵy komiteti tóraǵasynyń orynbasary Aian Bahiianov qatysty.
Esterińizge sala keteiik, Qazaqstan Respýblikasy Úkimetiniń qaýlysymen 2021-2030 jyldar aralyǵyna Balyq sharýashylyǵyn damytý baǵdarlamasy qabyldanǵan bolatyn. Atalǵan baǵdarlama sheńberinde oblys ákimdigimen Almaty oblysy boiynsha 2021-2030 jyldar aralyǵyna Óńirlik balyq sharýashylyǵyn damytý baǵdarlamasy qabyldandy.
Baǵdarlamalarǵa sáikes, 2030 jylǵa deiin respýblika boiynsha 270 myń tonna balyq ósirý josparlanýda.
