Senbiden jeksenbige qaraǵan túni Balqash qalasynda barak tiptes úilerdiń birinen órt shyqty. Jalynmen kúres aiaqtalǵan soń órt sóndirýshiler ot sharpyǵan páterden áiel adamnyń máiitin tapty, dep habarlaidy QazAqparat.
2 qazan saǵat 04:40-ta Balqash qalasynyń Rembaza kentindegi úilerdiń birinen órt shyqqany týraly habar kelip tústi.
Baraq úlgisindegi 4 páterli turǵyn úidiń №2 páterinde jalpy aýdany 30 sharshy metr aǵash eden, jihaz jáne úi zattary janǵan.
«TJD órt sóndirýshilerdiń kúshimen №1 páterden 1949 jyly týǵan áiel qutqaryldy. №2 páterden órt bolǵan jerden 1979 jyly týǵan (2-toptaǵy múgedek) páterdiń iesi tabyldy. Qabyldanǵan sharalardyń arqasynda órt 05:31-de sóndirildi. Órttiń sebebi - otty abaisyz qoldaný (sóndirilmegen temeki, sirińke jáne basqa)», - dep málimdedi Qaraǵandy oblysy TJD baspasóz qyzmeti.
Jyl basynan beri otty abaisyz qoldaný sebebinen Qaraǵandy oblysynda 248 órt boldy, onda 22 adam qaza taýyp, 9 adam jaraqat aldy.
Biylǵy 9 aida oblysta 772 órt tirkeldi, onda 34 adam qaza tapty, 29 adam jaraqat aldy.
Qaraǵandy oblysy TJ departamenti azamattardan óz qaýipsizdigi máselesine muqiiat jáne baiypty qaraýdy suraidy.
Eger siz belgili bir erejelerdi saqtasańyz, kez kelgen baqytsyzdyqtyń aldyn alýǵa bolady:
- sóndirilmegen temeki men sirińkelerdi qaldyrmaýǵa;
- elektr symdary men aspaptarynyń jaramdylyǵyn qadaǵalaý;
- elektr jelilerin shamadan tys júktemeý;
- tek jaramdy gaz jabdyǵyn paidalaný.
