Indoneziianyń Bali araly koronavirýstyń taralý qaýpine bailanysty sheteldik týrister úshin biylǵy jyldyń sońyna deiin jabyq bolmaq.
Buǵan deiin osy tanymal demalys ornynyń biligi araldy sheteldik demalýshylar úshin kelesi aidan bastap ashpaq bolǵan. Biraq Indoneziiada Covid-19 juqtyrý jaǵdailarynyń ósýine bailanysty jospar ózgertildi. Mundai qadam týrizmge qatty táýeldi ekonomikaǵa da áserin tigizdi, dep habarlaidy BBC agenttigi.
Jyl saiyn milliondaǵan sheteldikter Balige jaǵajailardy, kúrish alqaptary men úlken úndi hramdaryn izdep keledi. Biraq Indoneziia pandemiiamen kúres sharasy retinde shekarasyn japqannan keiin olardyń sany kúrt azaidy.
Shilde aiynan beri aral biligi pandemiiadan zardap shekken jergilikti ekonomikanyń «júregi» bolǵan týristik indýstriiaǵa kómektesý úshin jergilikti týristerge kóp kóńil bóle bastady. Balida jergilikti týrister úshin jaǵajailar, hramdar jáne basqa da kórikti jerler qaita ashyldy.
Bali gýbernatory Vaian Kosterdiń málimdemesinde araldyń sheteldik týrister úshin qaitadan qashan ashylatyny naqtylanbaǵan, biraq Indoneziia sheteldik demalýshylar úshin 2020 jyldyń sońyna deiin jabyq ekeni aitylǵan.
Gýbernatordyń aitýynsha, araldyń ashylýy «saqtyqty» jáne muqiiat daiyndyqty qajet etedi, óitkeni sátsiz jaǵdailar araldyń qalpyna kelýi men bedeline nuqsan keltirýi múmkin.
Dúisenbi kúngi jaǵdai boiynsha Balida koronavirýs juqtyrýdyń 4576 oqiǵasy tirkelgen. 52 adam qaýipti virýstan kóz jumǵan.
Búkil el boiynsha aýrýǵa shaldyǵýdyń 155000-nan astam oqiǵasy tirkelgen, 6759 adam qaitys bolǵan. Bul Ońtústik-Shyǵys Aziiadaǵy ólim jaǵdailarynyń eń kóp sany ekendigi atap ótildi. Sarapshylardyń paiymdaýynsha, eger koronavirýsqa testilerdi kóptep tapsyrsa, olardyń sany da kóp bolar edi.
