Ata-analar balasyn vaktsinatsiialaýdan bas tartý arqyly onyń densaýlyq quqyqtaryn shekteidi. Bul týraly QR Parlamenti Senatynyń jalpy otyrysynda QR Densaýlyq saqtaý ministri Eljan Birtanov aitty, dep habarlaidy "Ult aqparat".
«Ata-analar balasyn vaktsinatsiialaýdan bas tarta otyryp, balanyń densaýlyq quqyqtaryn shekteitindigin atap ótken jón. Jalpy, egilmegen adam sanynyń ósýi – ujymdyq immýnitettiń tómendeýine jáne halyqtyń arasynda vaktsinamen basqarylatyn infektsiialyq aýrýlardyń taralýyna alyp keledi», - dedi «Halyq densaýlyǵy jáne densaýlyq saqtaý júiesi týraly» kodeks pen «Keibir zańnamalyq aktilerge densaýlyq saqtaý máseleleri boiynsha túzetýler engizý jóninde» ilespe zań jobasyn tanystyrǵan ministr.
Onyń dereginshe, 2019 jyly qyzylsha aýrýymen aýyrǵandardyń arasynda 21 ólim, onyń ishinde 19 bala ólimi tirkelgen. Elimizde qyzylshanyń órshýi kezinde 13 800-den astam jaǵdai, balalar arasynda – 9 887 jaǵdai tirkeldi. Syrqattanýshylyqtyń 83,4 paiyzy egilmegen balalardyń arasynda tirkeldi. 2018 jylǵy 1 qarashadan bastap 2019 jylǵy 31 jeltoqsanǵa deiin – 8 244 bala aýyrdy.
«Halyq arasynda vaktsinamen basqarylatyn infektsiialar jaǵdailaryn tirkeý osal toptarǵa jatatyn balalardyń ómirine qaýip tóndiredi. Sonymen qatar, atalǵan normany jurtshylyqpen talqylaý nátijesinde profilaktikalyq ekpeler mindetti jáne erikti bolyp bólindi. Mindetti profilaktikalyq egýlerge josparly profilaktikalyq egýler jáne epidemiologiialyq kórsetilimder boiynsha profilaktikalyq egýler jatady. Josparly vaktsina almaǵan balalardy mektepke deiingi oqý mekemelerine jiberý – ujymdyq immýnitettiń shekti deńgeiine jetken jaǵdaida ǵana múmkin bolady», - dedi Eljan Birtanov.
