Foto: videodan skrinshot
Oqiǵa Jetisý oblysy Panfilov aýdany Jarkent qalasynda bolǵan, dep habarlaidy Ult.kz.
Balasyn aiaýsyz sabap jatqan video áleýmettik jelilerde tarap, politsiia tekseris júrgizdi. Atalǵan derek boiynsha qylmystyq is qozǵaldy. Áiel qajetti tergeý áreketterin júrgizý úshin politsiia bólimine jetkizilip, ýaqytsha ustaý izoliatoryna qamaldy.
"Eki bala qaýipsizdigin qamtamasyz etý maqsatynda barlyq mán-jaidy anyqtaǵanǵa deiin Otbasyn qoldaý ortalyǵyna ornalastyryldy. Qamqorshylyq jáne qorǵanshylyq organynyń atyna ata-ana quqyǵynan aiyrý máselesin qaraý týraly tiisti usynys joldanatyn bolady", - delingen habarlamada.
Tergeý barysy Jetisý oblystyq politsiia departamenti basshylyǵynyń jeke baqylaýynda ekeni jáne tergeý nátijesi boiynsha kináli tulǵalar jaýapqa tartylatyny aityldy.
Eske sala keteiik, Jetisý oblysynyń Jarkent qalasynda óz balasyn batareiaǵa bailap, birneshe minýt boiy uryp-soqqan áieldiń videosyn jýrnalist Janar Nurtazina Instagram jelisinde jariialady.
Videodan shamamen 3–4 jastaǵy balanyń shaǵyn páterdegi jylý batareiasyna qara jippen bailanǵany kórinedi. 30–35 jas shamasyndaǵy áiel qorǵansyz balany tepkilep, uryp, aýyr sózder aitqan. Kadrda páterde taǵy úsh balanyń júrgeni baiqalady. Zorlyq kórinisin bireý telefonǵa túsirip otyrǵan.
Jýrnalistiń aitýynsha, videony balanyń ákesi joldaǵan, al soqqy kórsetken - sol balanyń anasy.
