Qazaq tilindegi tuńǵysh balalar telearnasy «Balapan» Youtube jelisiniń «Altyn batyrmasyn» ielendi, dep habarlaidy QazAqparat.
Álemdik videohostingtiń «Altyn batyrmasy» paraqshaǵa 1 mln oqyrman jazylǵanda beriledi.
«Balapan» telearnasy 2017 jyldyń jeltoqsan aiynda You Tube-tiń «Kúmis batyrmasyn» alǵan bolatyn. Mine, araǵa 3 jyl salyp, «Altyn batyrmaǵa» da qol jetkizip, qýanyp jatqan jaiymyz bar. Búginde arnamyzdyń «You Tube» kanalyna jazylýshylar sany 1,2 mln-ǵa jýyqtady. Jalpy kanal ashylǵan 2013 jyldan bastap, jobalarymyz 430 538 382 qaralym jinady. Al jekelei aitsam, «Kúldir-búldir» sitkomynyń «Rasýl dárigerde» degen bólimi 10 057 749 qaralymmen kósh bastap tur. Osy sandardyń ózi-aq telearna kontentiniń qanshalyqty qyzyq ekenin jáne kórermenniń kóńilinen shyqqanyn ańǵartyp turǵandai. Airyqsha atap óterligi, Bizdiń «You Tube» arnamyzdy tek el ishinde ǵana emes, Qyrǵyzstan, Ózbekstan, AQSh, Resei, Shvetsiia, Ýkraina memleketeriniń kórermenderi de tamashalaidy», - dedi Balapan telearnasynyń basshysy Maqpal Jumabai QazAqparat tilshisine bergen suhbatta.
Arna basshysynyń aitýynsha, telearnanyń áleýmettik jelidegi paraqshalarynyń áleýetin keńinen damytý qolǵa alyndy. Iaǵni, Youtube kanalyn telearnadan tys damytý jumysy júieli júrgizilýde.
«Ásirese, pandemiia alǵa tartqan jańa úrdister zamanaýi tehnoloniialardy barynsha utymdy qoldaný qajettigin kórsetti. Nátijesinde, 2020 jyly 7 sheteldik kompaniiamen kelisimshart jasalyp, 23 animatsiialyq jobanyń internet quqyǵy satyp alyndy. Bizdiń arnamyz – sheteldik mýltfilmderdiń Youtube quqyǵyn ielengen alǵashqy qazaqstandyq arna. Búginde «Balapan» arnasynyń Youtube kanalyna 640 seriia mýltfilm qazaq tilinde júkteldi. Ózderińiz biletindei, álemdi dendegen pandemiia bastalǵaly arnamyz telemektep qyzmetin de atqaryp keledi. Telesabaqtar arnanyń Youtube kanaly arqyly da taratylady. Sáikesinshe, osy aralyqta kanalymyzǵa jazylýshylar sany da arta túskenin atap ótý kerek», - deidi Maqpal Jumabai.
Aita keteiik, YouTube jelisiniń 5 batyrmasy jáne eń kóp laik jinaǵan pikirge beriletin 1 júldesi bar. Kúmis (100 myń oqyrman), altyn (1 mln oqyrman), gaýhar (10 mln oqyrman), laǵyl (50 mln oqyrman) jáne qyzyl laǵyl batyrma 100 mln oqyrman jazylǵany úshin beriledi.
Balapan telearnasy 2010 jyldyń 27 qyrkúieginde Elbasy Nursultan Nazarbaevtyń bastamasymen ashylǵan edi. 10 jyl ishinde 246 televiziialyq joba, 19 telehikaia, 17 747 minýtty quraityn 67 animatsiialyq mýlthikaia jasalǵan. Qazaq kinoindýstriiasy tarihynda «Balapan» telearnasy tuńǵysh ret balalarǵa arnalǵan «Sanjar men Qaisar» telehikaiasyn, otandyq mýlthikaialar túsirýdi qolǵa alǵan.
