«Balapan» telearnasy kúzgi jańa maýsymda kórermenderine 11 animatsiialyq joba, 5 baǵdarlama jáne 4 teleserial usynady, dep habarlaidy "Ult aqparat".
Bul týraly Qazmedia ortalyǵynda «Qazaqstan» teleradiokompaniiasynyń jańa maýsym tanystyrylymynda aityldy.
Atap aitqanda, balalardy áskeri-patriottyq baǵytta tárbieleitin «Otanǵa qyzmet etemin!» tuńǵysh áskeri realiti-shoýy, elimizde tirshilik etetin ań-qustarmen tanysýǵa múmkindik beretin «Jan-janýarlar álemi» baǵdarlamasy, salaýatty ómir saltyn nasihattaityn otbasylyq «Tolaǵai» sporttyq saiysy, balalarǵa paidaly laifhaktar usynatyn «5 minýt» jobasy jáne eń kishkentai kórermenderge arnalǵan «Tái-tái shoýdyń» ekinshi maýsymy efirge shyǵady.
Sonymen birge, «Aýyl juldyzdary» men «Dostar» teleserialdary da óz kórermenderine jol tartady. Olardyń biri qyzyqqa toly aýyl ómirin sýrettese, biri - adal dostyqty dáripteidi. Arna kórermenderi súiip tamashalaityn, ázil-qaljyńǵa toly sitkomdar - «Synyq synyp» pen «Nemene» de maýsym jańalyǵy bolmaq.
«Balapan» birneshe animatsiialyq jobalarmen de qýantýǵa ázir. Olardyń qatarynda álemge tanymal jazýshylardyń ertegilerin animatsiia tilinde sóiletetin «Ǵajaiyp álem», shytyrman oqiǵaǵa toly «Kúlki izdegen Kúnekei», atty alǵash erttep mingen ata-babalarymyz jaily ańyzdy negiz etken «Pyraqtar», jaqsylyq jasap jarysýdy kózdegen «Qyzyl men Kúlgin» jobalary bar. Balalardyń kógildir ekrandaǵy dostaryna ainalyp úlgergen tól sýperqaharmandar da óz kórermenderimen qaita qaýyshady. «Aidar», «Dala oiyndary», «Ertemir» mýlthikaialarynyń III maýsymy bastalady«, - delingen habarlamada.
Sonymen qatar, telearnanyń «0+» kórermen aýditoriiasyna arnalǵan «Sábi», «Tynymsyz shójeler», «Oqiǵa» jáne «Aǵash at» animatsiialyq jobalary kórsetiledi.
