Halyqaralyq balalardyń quqyqtaryn qorǵaý kúnine orai Fingramota.kz saity balany qarjylyq saýattylyqqa baýlýdyń birneshe joly kórsetilgen nusqaýlyq jariialady, dep habarlaidy "Ult aqparat".
Salalyq resýrs ata-analardyń balalardy qarjylyq saýattylyq negizderine úiretetin negizgi segiz erejeni kórsetken.
№ 1 ereje – is áreketpen úlgi bolý. Mundaǵy basty keńes – eresek adamnyń ózi qarjylyq turǵydan saýatty bolýy kerek.
«Eger ózińizde biýdjetti josparlaýdyń qarapaiym daǵdylary bolmasa, balalaryńyzdyń uzaq merzimdi josparlaýdyń ne ekenin túsinýi qiyndaý bolady. Eger otbasyńyzda qarjy máselesi rettelgen bolsa, balańyz da eseigende soǵan umtylady», - dep jazady Fingramota.kz.
№ 2 ereje – aqsha jaiynda tanymdyq oiyndar arqyly aqparat sińirý. Sol oiyndardyń kómegimen jalǵan aqsha men shynaiy aqshanyń aiyrmashylyǵyn, aqshanyń qaidan kelip jatqanyn, aqshaǵa eń birinshi kezekte ne satyp alý mańyzdy ekenin túsindirý usynylǵan.
№3 ereje – balany aqsha jinai bastaǵanyn kótermeleý.
«Balańyzdyń armandap júrgen zatyn alýy úshin aqsha jinaýǵa úiretińiz. Mundaida sizge aqsha-qorjyn nemese qarapaiym shyny banka kómektesedi. Bastysy ydystyń ishindegi aqsha birtinep kóbeiip kele jatqany kórinip turýy kerek», - dep jazady avtor.
№4 ereje – kúndelikti shyǵyndy tiimdi josparlaý daǵdysyn úiretý. Ol úshin aptalyq «qaltapul» berý usynylǵan. Eger bala barlyq aqshasyn bir kúnniń ishinde jumsap qoisa, aqshasyz otyra turýǵa týra keledi.
№ 5 ereje – balany óz betimen saýda jasaýǵa beiimdeý. Mundaǵy basty qaǵida - ózi jinaǵan aqshaǵa óz qalaǵan dúniesin alǵyzý.
№ 6 ereje – óz biýdjetn basqarýdy úiretý.
«Balaǵa siz bergen aqsha nemese týystary týǵan kúnine syiǵa bergen aqsha –tolyǵymen óziniki ekenin uqtyrý kerek. Demek, kez kelgen sheshim úshin bala ózi jaýapty bolady. Ózińizdiń mysalyńyz arqyly otbasylyq biýdjetti qalai júrgizetinińizdi, eńbek aqysyn qalai úlestiretinińizdi aita alasyz. Qansha aqshańyz mindetti tólemderge ketedi, qanshasyn eńbek demalysyna saqtap qoiasyz», - dep jazylǵan nusqaýlyqta.
№ 7 ereje – balanyń qatelesý quqyǵyn syilaý. Mamandar bul jerde balanyń aqsha máselesine kelgende kózqarasy ata-ananyń kózqarasyńyzdan erekshe bolýy múmkin ekenin eskertedi. Osyny eskerip, oyń jasaǵan áreketterin synamaý kerektigi aitylǵan.
«Mysaly, eger ol qandai da bir mańyzdy ári iri saýdaǵa jinaýǵa josparlaǵan aqshasyn bir sáttik qalaýyna jumsaǵan bolsa, oǵan uryspańyz. Ol úshin endi aqsha jinaý merzimi qanshalyqty uzarǵanyn birge sanańyzdar da, aqsha tabýdyń jańa múmkindikterin tabýǵa kómektesińiz», - dep jazady Fingramota.kz.
№8 ereje – qosymsha tabys nusqalaryn usyný. «Jumysty birden belgilep, somany anyqtaǵan durys. Mysaly, mindetti túrde itti serýendetý, úi janýarlaryn kútý, baýyrlary men qaryndastaryna qaraý, ájesine baqsha jumystarynda kómektesý jáne t.b. Eń mańyzdysy, siz «tarifterdi» kóńil-kúiińizge qarai aýystyrmaýyńyz kerek. Osy qarapaiym, biraq negizgi erejelerdi saqtap, siz balanyń jastaiynan aqshaǵa degen durys qatynasyn ornatasyz», - delingen habarlamada.
