«Qazaqstan Respýblikasyndaǵy balanyń quqyqtary týraly» Zańyna jáne Qazaqstan Respýblikasynyń «Bilim týraly» Zańyna engizý usynylyp jatqan «býlling» uǵymy belsendi talqylanyp jatyr. Nur Otan partiiasy janyndaǵy Otbasy, áielder jáne balalardyń quqyqtaryn qorǵaý máseleleri jónindegi respýblikalyq qoǵamdyq keńestiń tóraiymy Dinara Zakieva osylai málim etti, dep habarlaidy "Ult aqparat".
«Qazir Qazaqstan Respýblikasynyń «Qazaqstan Respýblikasyndaǵy balanyń quqyqtary týraly» Zańyna jáne Qazaqstan Respýblikasynyń «Bilim týraly« Zańyna engizý usynylyp jatqan «býlling« uǵymy belsendi talqylanýda.
Jurtqa málim, QR Prezidenti Qasym-Jomart Toqaev QR 2021 jyldyń qańtarynda VII shaqyrylǵan Parlamentiniń birinshi sessiiasynyń ashylýynda balalardyń quqyqtaryn qorǵaý, olardyń qaýipsizdigin qamtamasyz etý jáne býllingtiń aldyn alý máselelerin sheshý úshin sharalar qabyldaý qajet ekenin aitty. Buǵan deiin Prezident 2020 jylǵy Joldaýynda kiberbýllingtiń aldyn alý boiynsha sharalar qabyldaý qajettigin erekshe atap ótken», dep jazdy Dinara Zakieva Facebook-tegi paraqshasynda.
Býlling (qorlaý) - balalardyń aldynda turǵan, kóbinese mektepte kezdesetin ózekti máselelerdiń biri. QR Ulttyq densaýlyq saqtaý ortalyǵynyń málimetterine sáikes 2018 jyly elimizdegi oqýshylardyń 12%-dan astamy býlling pen qorlaýǵa ushyraǵan. Tek ótken jyldyń ózinde 143 jasóspirim ózine qol jumsaǵan, 306 jasóspirim buǵan árekettengen.
«Atalmysh máseleni zertteý, aldyn alýǵa baǵyttalǵan baǵdarlamalar ázirleý, osy qubylysqa ákeletin sebeptermen ainalysý, mekteptegi býllingten (qorlaýdan) qorǵaý úshin tujyrymdamanyń ózin engizý qajet», - deidi Dinara Zakieva.
Onyń aitýynsha, tujyrymdamanyń bolmaǵandyqtan resmi statistika da júrgizilmeidi.
«Tujyrymdama redaktsiiasyn talqylaý maqsatynda barlyq tilek bildirýshiler QR Bilim jáne ǵylym ministrliginiń alańynda ótetin kishi topqa biriktirildi. Tujyrymdamanyń redaktsiiasynda jumys isteýge niet bildirgenderdiń bári talqylaýǵa kedergisiz qosyldy. Atalmysh topqa jyldar boiy balalar men otbasylarǵa, sonyń ishinde zorlyq-zombylyq qurbandaryna kómektesetin kóptegen qoǵam qairatkerleri, sarapshylar qatysýda. Olardyń qatarynda Qýat Dúisen - Ahmet Baitursynuly atyndaǵy Til bilimi institýtynyń kishi ǵylymi qyzmetkeri, PhD doktorant, belgili professor M. Sh. Qoǵamov, belgili til mamandary da bar», - dedi ol.
Onyń aitýynsha, jumys toptarynyń otyrystaryna qatysqysy keletinderdiń barlyǵyna ár sársenbi kúni saǵat 15.00-de QR Parlamentiniń saitynda otyrystyń tikelei efiri ótedi. Otyrys memlekettik jáne orys tilderinde júrgiziledi.
«Tujyrymdamanyń redaktsiiasy ázirlengennen keiin ol negizgi jumys tobynda ótkiziletin talqylaýǵa shyǵarylady. Jumys toby ony talqylap, daýys berý ótkizedi. Ár otyrystyń aldynda 109 adam qatysatyn jumys jáne saraptama toptarynyń barlyq múshelerine kesteler memlekettik jáne orys tilderinde jiberiledi», - dedi Dinara Zakieva.
Qoǵamdyq keńestiń tóraiymy óziniń de ata-ana ekenin aityp, bul usynys eń aldymen elimizdiń barlyq balasyn qorǵaý úshin engizilip jatqanyn atap ótti.
«Ókinishke qarai, qazir qoǵam ókilderiniń keibiri syndarly usynys jasamai, balalarǵa kómektesý tájiribesi bolmai, protsesti saiasattandyrýda, halyqty býlling úshin jaza (onyń ishinde qylmystyq jaza) qarastyrylǵan dep adastyryp, aila-sharǵy jasap basqa da shyndyqqa sai kelmeitin aqparat taratyp júr.
Shyndyqqa sai kelmeitin aqparatty taratqandarǵa áreketteri úshin zań boiynsha jaýapkershilik kózdelgenin eske salǵym keledi.
Barlyq aqparatty QR Parlamentinen nemese jumys tobynyń jetekshisi retinde menen resmi túrde suraýlaryńyzdy ótinemiz», dedi Dinara Zakieva.
