QR Eńbek jáne halyqty áleýmettik qorǵaý ministriniń buiryǵymen balaly otbasylarǵa memlekettik járdemaqyny taǵaiyndaý tártibine ózgerister engizildi, dep habarlaidy "Ult aqparat".
«Balaly otbasylarǵa beriletin memlekettik járdemaqylardy taǵaiyndaý jáne tóleý qaǵidalaryn bekitý týraly» 2015 jylǵy 5 mamyrdaǵy № 319 buiryqqa birshama ózgerister men tolyqtyrýlar engizildi.
Jalpy balaly otbasylarǵa beriletin memlekettik járdemaqylarǵa mynadai túrdegi aqshalai tólem túrleri jatady:
- bala týýǵa bailanysty taǵaiyndalatyn jáne tólenetin birjolǵy memlekettik járdemaqy (budan ári - bala týǵanda beriletin járdemaqy);
- bala bir jasqa tolǵanǵa deiin onyń kútimine bailanysty taǵaiyndalatyn jáne tólenetin ai saiynǵy memlekettik járdemaqy (bala kútimi boiynsha járdemaqy);
- quramynda birge turatyn kámeletke tolmaǵan tórt jáne odan kóp balasy, onyń ishinde kámelettik jasqa tolǵannan keiin bilim berý uiymdaryn bitiretin ýaqytqa deiin (biraq 23 jasqa tolǵanǵa deiin) orta, tehnikalyq jáne kásiptik, orta bilimnen keiingi, joǵary jáne (nemese) joǵary oqý ornynan keiingi bilim berý uiymdarynda kúndizgi oqý nysany boiynsha bilim alatyn balalary bar kópbalaly otbasylarǵa taǵaiyndalatyn jáne tólenetin ai saiynǵy memlekettik járdemaqy (budan ári - kópbalaly otbasyǵa beriletin járdemaqy);
- múgedek balany (múgedek balalardy) tárbielep otyrǵan anaǵa nemese ákege, bala asyrap alýshyǵa, qamqorshyǵa (qorǵanshyǵa) taǵaiyndalatyn jáne tólenetin ai saiynǵy memlekettik járdemaqy (múgedek balany tárbieleýshige beriletin járdemaqy);
- bala kezinen birinshi toptaǵy múgedektiń kútimi boiynsha taǵaiyndalatyn jáne tólenetin ai saiynǵy memlekettik járdemaqy (bala kezinen birinshi toptaǵy múgedektiń kútimi boiynsha járdemaqy);
- «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen nagradtalǵan kópbalaly analarǵa taǵaiyndalatyn jáne tólenetin ai saiynǵy memlekettik járdemaqy (kópbalaly analarǵa beriletin járdemaqy).
«Bala týǵanda beriletin jáne bala kútimi boiynsha járdemaqylardy taǵaiyndaý úshin ótinish berýshi Memlekettik korporatsiia nemese portal arqyly járdemaqy taǵaiyndaý jónindegi ýákiletti organǵa «Bala týǵanda beriletin jáne bala kútimi boiynsha járdemaqylardy taǵaiyndaý» memlekettik kórsetiletin qyzmet standartynda kórsetilgen qujattardy qosa bere otyryp, ótinim berýi tiis», - delingen qujatta.
Ótinish berýshiniń elektrondyq ótinishinde kórsetilgen ótinish berýshiniń jeke basyn kýálandyratyn qujat, balanyń (balalardyń) týý týraly kýáligi (kýálikteri) nemese azamattyq hal aktilerin jazý organdary bergen týý týraly aktilik jazbadan úzindi kóshirme nemese azamattyq hal aktilerin tirkeý týraly anyqtamanyń málimetteri, neke qiiý (erli-zaiyptylyq), nekeni buzý týraly kýálik, balaǵa qamqorshylyq (qorǵanshylyq) belgilengenin rastaityn qujat nemese týý týraly aktilik jazbadan bala asyrap alý týraly málimetter, turǵylyqty jeri boiynsha tirkelýi týraly málimetter memlekettik organdardyń jáne uiymdardyń aqparattyq júielerine suraý salýlarǵa sáikes «elektrondyq úkimet» shliýzi arqyly tiisti memlekettik aqparattyq júielerden alynady.
Bala týýdy tirkegen kezde kórsetiletin qyzmetti alýshynyń tańdaýy boiynsha «Bala týǵanda beriletin jáne bala kútimi boiynsha járdemaqylardy taǵaiyndaý» memlekettik qyzmeti «bir tereze» qaǵidaty boiynsha kórsetiledi.
Kópbalaly otbasyna beriletin járdemaqy Memlekettik korporatsiia arqyly járdemaqy taǵaiyndaý jónindegi ýákiletti organǵa ótinish bergen kúnnen bastap taǵaiyndalady. Júginý kúni ótinish bergen kún bolyp esepteledi.
Kóp balaly otbasyna járdemaqy taǵaiyndaý kezinde otbasy quramynda tiri týǵan, asyrap alynǵan, sondai-aq qorǵanshylyqqa alynǵan balalar, eger olar basqa ata-anasynyń otbasynda eskerilmegen bolsa, jiyntyq balalar eskeriledi.
