Foto:polisia.kz
Balalarynyń túngi júrisi úshin 150 shymkenttik jaýapqa tartyldy, – dep habarlaidy Ult.kz Polisia.kz-ke silteme jasap.
Ótken demalys kúnderi megapolis politseileri kámeletke tolmaǵandar arasyndaǵy quqyq buzýshylyqtardyń aldyn alý, balalardy túngi ýaqytta úiinen tys jerlerde júrgende bolýy múmkin qaýipti jaǵdailardan qorǵaý, zań men tártiptiń saqtalýyn qamtamasyz etý maqsatynda reidtik is-sharalar ótkizdi.
Profilaktikalyq sharaǵa jergilikti atqarýshy organdar, jastar resýrstyq ortalyǵynyń ókilderi qatysty. Túngi patrýldeý kezinde tártip saqshylary beimezgil ýaqytta kóshede júrgen 141 balany anyqtady. Olardyń ata-analary ákimshilik jaýapqa tartyldy.
Sondai-aq oiyn-saýyq mekemelerinde bolǵan kámeletke tolmaǵan 9 bala anyqtalyp, zańdy ókilderine qatysty hattamalar toltyryldy. Al mundai zań buzýshylyqqa jol bergen kásipkerlerge ákimshilik kodekske sáikes aiyppul salyndy. Ata-anasynyń qadaǵalaýynsyz júrgen segiz jasóspirim beiimdeý ortalyǵyna ornalastyryldy.
Politseiler kámeletke tolmaǵandar arasyndaǵy qylmystyń aldyn alýǵa baǵyttalǵan reidter turaqty túrde júrgizilip jatqanyn eske salady.
