Qaryzǵa aqsha berip, ornyna azamattardyń úii men kóligin iemdendi dep aiyptalǵan Rita Ýteýovanyń isin kassatsiialyq sot qaraidy. Tergeý materialdaryna sáikes, kelisimsharttarda naqty berilgen somadan birneshe ese kóp qaryz kórsetilip, azamattardyń múlki kepilge alynǵan, dep habarlaidy ult.kz.
Kozachkov offside Telegram-arnasynyń málimetinshe, «Evro Lombard» uiymynyń burynǵy direktory qarjylyq qiyndyqqa tap bolǵan adamdarǵa qaryz berip, olardyń múlkin iemdengeni úshin jaýapqa tartylǵan.
Máselen, bir áiel 4 million teńge qaryz alý úshin quny 50 million teńge bolatyn úiin kepilge qoiyp, keiin baspanasynan aiyrylǵan. Keltirilgen shyǵyn 27 million teńgeden asqan. Taǵy bir azamat shamamen 50 myń dollar qaryz alyp, aqyrynda úii men kóliginen aiyrylǵan. Al balasyna ota jasatý úshin 7 million teńge suraǵan áieldiń kelisimshartynda 14 million teńge kórsetilip, páteri satylǵan.
Tergeý 2016 jyly bastalyp, is boiynsha alaiaqtyq, zańsyz kásipkerlik jáne óz betinshe áreket etýge qatysty 15 epizod tirkelgen.
2024 jyly Ýteýova aqtalǵanymen, Joǵarǵy sot Bas prokýrordyń narazylyǵynan keiin aqtaý úkiminiń kúshin joiyp, isti qaita qaraýǵa jibergen. Qaita qaraý nátijesinde Ýteýova men onyń sybailastary alaiaqtyq jasaǵany úshin kináli dep tanylǵan. Negizgi aiyptalýshy 6 jyl 6 aiǵa bas bostandyǵynan aiyrylǵan.
Endi isti kassatsiialyq sot qaraidy. Tergeý barysynda Ýteýovanyń on jer telimi, basqa da jyljymaityn múlikteri jáne tórt kóligi bary anyqtalǵan. Olardyń taǵdyry da sotta sheshilýi múmkin.
