Balqash qalasynan Almaty oblysyna «qylmystyq gastrolge» kelgen eki áiel býtikter men dúkenderde urlyq jasady degen kúdikpen ustaldy, dep habarlaidy "Ult aqparat".
«Tergeý barysynda kúdiktilerdiń Balqash qalasynan kelgeni, qoldaryna jas balalar ustaǵan eki áieldiń apaly-sińlili ekeni anyqtaldy. Olarǵa bir kún ishinde taýar-materialdyq qundylyqtardy urlaýdyń bes deregin jasady degen aiyp taǵyldy», - dep málimdedi Almaty oblysy Politsiia departamentiniń baspasóz qyzmeti.
9 aqpanda Qarasai aýdanynyń «MOLL APORT» saýda oiyn-saýyq kesheninde urlyq jasady degen kúdikpen 30 jáne 33 jastaǵy eki áiel ustaldy. Kúdikke ilingen áielderdiń 1 jastan asqan jáne 7 jastaǵy búldirshinderi bar. Jeke basyn tekserý kezinde olardan áielder men balalardyń urlanǵan jańa kiimderi tabylyp, olardyń keshen aýmaǵyndaǵy dúkenderdiń birinen jymqyrylǵany anyqtaldy. Sonymen qatar, beinebaqylaý jazbalarynyń kómegimen bultartpas aiǵaqtar arqasynda kúdiktiler budan ózge taǵy tórt býtik jáne dúkende oryn alǵan urlyqtaryn moiyndady. Úptep ketken zattaryn qaida jasyrǵanyn kórsetken.
«Olar bir kún ishinde jalpy somasy 350 000 teńgeden asatyn somanyń taýarlaryn urlaǵan. Onyń ishinde maika, fýtbolka, palto, djinsy jáne ózge de kiimder bar. Urlanǵan múlik qajetti tergeý áreketterinen soń zańdy ielerine qaitaryldy. Ózgeniń múlkin urlaýdyń bes deregi boiynsha QR Qylmystyq kodeksiniń 188-baby 3-tarmaǵyna sáikes sotqa deiingi tergeý amaldary júrgizilip jatyr», - dep tolyqtyrdy vedomstvo ókilderi.
Sonymen qatar, kúdiktilerdiń biriniń qylmystyq tájiribesi bar. Ol Nursultan qalasyndaǵy býtikterden zattardy urlaǵany úshin jaýapqa tartylyp, taraptardyń tatýlasýyna bailanysty qylmystyq is sotqa jetpei, qysqartylǵan. Kúdiktilerdiń kámeletke tolmaǵan jas balalarynyń bar ekeni eskerilip, olar mekenjaiyn ózgertpeý týraly mindettememen bosatyldy.
