14 naýryz kúni Naýryz meiramy qarsańynda Astanada Qazaqstan Respýblikasy Tuńǵysh Prezidenti – Elbasynyń qory men Memlekettik tildi damytý qory «Tátti alma» atty ertegiler men teatrlyq qoiylymdar jinaǵynyń tusaýkeserin ótkizdi.
Balalar jinaǵy óskeleń urpaqty qazaq ádebi tilin úirenýge, rýhani qundylyqtardy qasterleýge baýlý, olardyń shyǵarmashylyq jáne intellektýaldy qabiletterin arttyrý maqsatynda shyǵarylyp otyr.
«Tátti alma» jinaǵynyń 1-2 tomy 2015 jyly Qazaqstan Respýblikasynyń Prezidenti N.Á.Nazarbaevtyń Memlekettik tildi damytý qoryna ana tilimizdi damytý baǵytyndaǵy jobalarǵa bólingen qarjysyna jaryq kórgen bolatyn. Osy jinaqtyń 3-4 tomdaryn shyǵarýǵa Qazaqstan Respýblikasy Tuńǵysh Prezidenti – Elbasynyń qory qoldaý kórsetti.
Sońǵy jinaqtarǵa jaqsylyq pen ásemdik, tabiǵatqa degen qamqorshylyq týraly ertegiler men teatrlyq qoiylymdar engen. Kitapqa engen shyǵarmalardy “Tattialma.kz” saitynan oqýǵa bolady.
Is-sharaǵa QR Tuńǵysh Prezidenti – Elbasy qory atqarýshy direktorynyń orynbasary – Sultan Aitjanov, Memlekettik tildi damytý qorynyń direktory Azat Sháýeev, qurastyrýshylar - balalar jazýshysy Sháken Kúmisbaiuly men aqyn Aqberen Elgezek, sondai-aq belgili qoǵam qairatkerleri men oqýshylar qatysty.
Jinaqtyń arnaiy tanystyrylymyna jinalǵan qaýym «Balapan» telearnasy jas daryndarynyń ónerin tamashalady. Jas ónerpazdar jańa jinaqqa engen teatrlyq qoiylymdardy oryndap, óleńder oqydy jáne án aitty.
Is-shara sońynda balalarǵa merekelik dastarqan jaiylyp, «Tátti alma» jinaǵy men alma syiǵa tartyldy.
Tusaýkeser rásimin ótkizýge «Balapan» telearnasy aqparattyq qoldaý kórsetti.
