Foto: Qaraǵandy oblysynyń ákimdigi
Qaraǵandy oblysynyń balalaryna arnaýly áleýmettik qyzmet kórsetý ortalyǵy direktorynyń mindetin atqarýshy jáne 12 qyzmetker jumystan shettetildi, dep habarlaidy "Ult aqparat" aimaq basshysynyń baspasóz qyzmetine silteme jasap.
Qazir mekemege basqa uiymdardyń mamandary jiberilgen. Ortalyq tárbielenýshileriniń aýrýhanaǵa túsip, bir balanyń qaitys bolýynyń sebepteri anyqtalyp jatyr.
Oblys ákimi Ermaǵanbet Bólekpaev qaitys bolǵan balanyń ata-anasyna kóńil aitty.
"Balanyń kóz jumýyna ákep soqqan qaiǵyly oqiǵaǵa qabyrǵamyz qaiysyp otyr. Qazir barlyq kúsh-jigerimiz aýrýhanada jatqan balalardyń densaýlyǵyn múmkindiginshe tez qalpyna keltirýge baǵyttalǵan. Dárigerler bul úshin qoldan kelgenniń bárin jasaidy. Men bul tótenshe jaǵdaidyń iz-túzsiz ótpeitinine sendirgim keledi. Kináliler zańnyń barlyq qatańdyǵymen jazalanady. Tergeý organdary barlyq qajetti sharalardy júrgizedi. Al otbasyna barlyq qajetti kómek kórsetiledi", – dedi Bólekpaev.
Qaitys bolǵan Ádil Omarov 13 jasta edi. Densaýlyq saqtaý ministri Ajar Ǵiniiattyń aitýynsha, balanyń ólimine júrek jáne tynys alý jetkiliksizdigi sebep bolǵan.
Kómek kórsetý jáne bolǵan oqiǵanyń sebepterin anyqtaý úshin Qaraǵandyǵa Astanadan jetekshi mamandar toby da kelgen.
"Balalar temperatýranyń joǵarylaýyna, qusýǵa jáne ishtiń aýyrsynýyna shaǵymdanǵandyqtan, "tamaqtan ýlaný" diagnozy qoiyldy. Biraq aldyn ala synaqtar ishek infektsiiasy joq degen nátije berdi. Juqpaly etiologiiany, iaǵni aýrýdyń sebebin biz áli tapqan joqpyz. Búgingi tańda alty bala reanimatsiia bóliminde, olardyń ekeýiniń jaǵdaiy óte aýyr. Qalǵandarynda emdelý aiasynda jaqsarý baiqalady, olardyń jaǵdaiy qanaǵattanarlyq", – dep túsindirdi Ajar Ǵiniiat.
Onyń aitýynsha, naqty diagnoz joq, barlyq zerthanalyq zertteýler áli de júrgizilip jatyr.
Ministr Elordadan 10 jetekshi maman kelgenin atap ótti. Olardyń qatarynda shtattan tys bas balalar infektsionisti Dinagúl Baesheva, shtattan tys bas balalar anesteziolog-reanimatology Nurila Maltabarova, úsh dáriger-toksikolog jáne t.b. qyzmetkerler bar. Olar qaraǵandylyq mamandarmen, sonyń ishinde psihiatrlar jáne balalar nevropatologtarymen birge jumys istep jatyr. 20-ǵa jýyq maman konsiliým ótkizedi, balalardy tekseredi jáne emdeýdi túzetedi.
