QR Premer-Ministriniń orynbasary Eraly Toǵjanov balalardyń tutyný sebetin engizý múmkindigi týraly túsinik berdi, dep habarlaidy "Ult aqparat".
Balalarǵa arnap jeke tutyný sebetin engizý týraly depýttatyq saýalǵa jaýap bergen vitse-premer bul usynystyń qazir orynsyz ekenin túsindirgen.
«Bir adamǵa shaqqandaǵy eń tómengi aqshalai tabysty anyqtaý úshin eń tómengi kúnkóris deńgeii qoldanylady. Ol adam ómirin qamtamasyz etý úshin qajetti azyq-túlik ónimderiniń, taýarlar men qyzmetterdiń eń tómengi jiyntyǵyn bildiredi. Onyń mólsheri balalardy qosa alǵanda jan basyna shaqqanda jáne halyqtyń jynystyq-jas toptary boiynsha esepteledi», - degen Eraly Toǵjanov óz jaýabynda.
Onyń aitýynsha, qazirgi eń tómengi kúnkóris deńgeiiniń azyq-túlik qorjynyna táýligine 2175 kkal energetikalyq qundylyqty qamtamasyz etetin tamaq ónimderiniń 43 ataýy kiredi. Bul tizim Tamaqtaný institýtynyń usynymdaryna jáne Dúniejúzilik azyq-túlik uiymy men Dúniejúzilik densaýlyq saqtaý uiymynyń tamaqtaný talaptaryna sáikes jasalǵan.
«Osyǵan bailanysty, balalar tutyný qorjynyn jeke esepteýdi merziminen buryn dep sanaimyz», - dedi Eraly Toǵjanov.
