Biyl 300 balalar úiine tekserý júrgiziledi. Bul jaiynda Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Balalardyń quqyqtary men zańdy múddelerin qamtamasyz etý úshin respýblikada balalar quqyqtaryn qorǵaý salasyndaǵy memlekettik baqylaý júiesi qalyptastyrylǵan. «Nur Otan» partiiasy janyndaǵy Otbasy, ááielder men balalar quqyqtaryn qorǵaý jónindegi keńestiń jumys toby ótkizgen monitoring nátijeleri 2019 jyldyń 22 qarashasynda jergilikti atqarýshy organdardyń qatysýymen QR Úkimeti janyndaǵy Kámeletke tolmaǵandar isi jáne olardyń quqyqtaryn qorǵaý jónindegi vedomstvoaralyq komissiia otyrysynda talqylandy», - dedi ol.
Onyń atap ótýinshe, komissiia jumysynyń qorytyndysynda jergilikti atqarýshy organdarǵa naqty usynymdar berildi. Ortalyq memlekettik organdar, komissiia balalar quqyqtaryn qorǵaý boiynsha qyzmetterdi júzege asyratyn uiymdardaǵy kámeletke tolmaǵandardyń tárbilený, bilim alý jaǵdailaryn baqylaýdy qamtamasyz etedi.
«Bilim jáne ǵylym, Eńbek jáne halyqty áleýmettik qorǵaý ministrlikteri 2020 jyly arnaýly áleýmettik qyzmet kórsetetin 386 bilim berý uiymy men 20 balalar ortalyqqa tekserý júrgizdi. Sonymen qatar 2020 jyly Bas prokýratýra ata-analarynyń qamqorlyǵynsyz qalǵan balalar men jetim balalarǵa arnalǵan 76 uiymdy eki ret tekserdi. Biyl bul jumys kúsheitilip, óńirlik prokýratýralar men bilim berý organdarynyń 300 balalar mekemesin keshendi tekserýi josparlanǵan. Sonymen qatar ata-analarynyń qamqorlyǵynsyz qalǵan balalar men jetim balalarǵa arnalǵan 116 uiym Qarjy ministrliginiń qarjylyq qyzmet bóligine memlekettik aýdit júrgiziletin nysandar tizilimine engizilgen», - dedi Asqar Mamin.
