1 maýsym - Balalardy qorǵaý kúni. Bul balǵyn búldirshinderimiz úshin eń qýanyshty jáne jyl saiyn kútetin basty merekeleriniń biri. Jalpy alǵanda, balalarǵa qamqorlyq kórsetý, olardyń quqyqtaryn qorǵaý tek belgilengen bir kún emes, árqashan da úlkenderdiń nazarynda. Osy oraida 1 maýsym kúni Qazaqstan Respýblikasy Ulttyq mýzeiinde merekege orai uiymdastyrylǵan «Keskindeme jáne grafika» úiirmesi qatysýshylarynyń jumystarynan quralǵan «Árbir úige erkemiz, sýretten syr shertemiz» atty balalar kórkemsýret kórmesi ashyldy.
Balalalardyń shyǵarmashylyq kórmesiniń maqsaty mýzeidegi «Keskindeme jáne grafika» úiirmesi oqýshylarynyń shyǵarmashylyq nátijelerin kórsetýdi jáne jasóspirimderdiń estetikalyq tárbiesin qalyptastyrýdy kózdeidi.
Kórmeni QR Ulttyq mýzeiiniń mýzei pedagogikasy jáne balalar shyǵarmashylyǵy bóliminiń estetikalyq tárbie berý jumysy sektory uiymdastyrdy.
Atalmysh merekelik kórmege úiirme qatysýshylarynyń 40 shaqty shyǵarmashylyq jumysy qoiyldy. Bala qiialy men arman-tilegi ushtasqan shyǵarmashylyq kórme osylaisha óziniń bir jyldyq jumysyn qorytyndylady. Merekelik quttyqtaý sóz alǵan Qazaqstan Respýblikasy Ulttyq mýzeii ekskýrsialiq jumystar jáne mýzei pedagogikasy ortalyǵynyń jetekshisi J.S. Beisova jáne úiirme jetekshisi QR dizainerler odaǵynyń múshesi M.Q. Baibosynovtar balalardy merekemen quttyqtap, aq tilekterin arnady. Kórmeni qyzyǵa tamashalaǵan kórermen balalar arasynda oiyndar uiymdastyrylyp, jeńimpazdar túrli syilyqtarmen marapattaldy. Merekelik kórmeniń saltanatty ashylýynyń sońy Astana qalasy №70 mektep-litseiiniń ónerli balalarynyń daiyndaǵan «Balǵyn balalar – bizdiń bolashaǵymyz» atty merekelik kontserttik baǵdarlamasyna ulasty.
Balalarǵa qýanysh syilaǵan merekelik sharanyń sońynda Qazaqstan Respýblikasy Ulttyq mýzeii ujymy atynan ónerli balalarǵa estelik syilyqtar tabys etildi.
