«Mektep sporty federatsiiasy» ZTB resmi ókili Áliia Túsipbekova balalardyń deniniń saýlyǵyna kóbirek nazar aýdarýǵa shaqyrdy, dep habarlaidy QazAqparat.
«Keiingi jyldary sportqa kóbirek mańyz berilip keledi. Qazirgi ýaqytta barlyq basymdyq kásibi sporttan balalar sportyna aýyp bara jatyr. Ókinishke qarai jyldar boiy balalar sporty tárbielik jáne bilim berý protsesteriniń kóleńkesinde qalyp keldi. Balalar-jasóspirimder sport mektebine bólinetin dotatsiialar jastardy jappai sportqa tarta almady», - deidi Áli Túsipbekova OKQ-da ótken baspasóz máslihatynda.
Onyń aitýynsha buryn aýladaǵy sport máselelerine de durys nazar aýdarylmai kelgen.
«Bul turǵyda Qazaqstan kóptegen elden artta qaldy. Osynyń saldarynan ýaiymdatarlyq tendentsiiamen betpe-bet kelip otyrmyz. Belsendi ómir saltyn ustanatyn balalar men jasóspirimderdiń sany 30 paiyzdan aspai keledi. Áskerge shaqyrylatyn jastardyń 40 paiyzy densaýlyǵy boiynsha áskeri qyzmettiń talaptaryna sai kelmeidi. Dene shynyqtyrý sabaqtary balalardyń denesin shynyqtyryp, sportqa baýlý boiynsha qajettilikke jaýap bermeidi. Balalardyń bir bóligi kóz aýrýynan qinalsa, ekinshi bóligi semizdikten de qiyndyq kórip otyr. Balalardyń múgedektiginiń artyp kele jatqany alańdatady. Mundaǵy negizgi sebepter – týabitti anomaliia, júike júiesiniń aýrýlary men psihikalyq aýytqýshylyqtar. Balalardyń denesin shynyqtyrý jáne saýyqtyrý boiynsha bilikti mamandar jetispeidi», - dedi spiker.
Ol sóz sózinde bilim berý uiymdarynda dene shynyqtyrý men sportty damytý boiynsha sharalar kesheni az ekenin aitady.
«Birinshi kezekte mektep sportynyń júiesi retke keltirilmegen. Júrgizilgen taldaý kórsetip otyrǵandai, mektep saiystaryna qatysatyn quram halyqaralyq standarttarǵa sai kele bermeidi. Burynǵydai jergilikti atqarýshy organdar ótkizetin sporttyq saiystarǵa kóbinese balalar-jasóspirimder sport mektebiniń sportshylary tartylady», - deidi Áliia Túsipbekova.
