Jergilikti ákimdikter balalar men jasóspirimderdi sporttyq jáne shyǵarmashylyq úiirmemen qamtamasyz etý isine salǵyrt qarap otyr, dep habarlaidy QazAqparat.
Mádeniet jáne sport vitse-ministri Erlan Qojaqapanov Úkimet janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi vedomstvoaralyq komissiianyń otyrysynda osyndai málimet berdi.
«Balalar men jasóspirimderdi úiirmelermen qamtý isinde jan basyna shaǵyp qarjylandyrý tetigi iske qosylǵanyn bileizder. Osylaisha 4-18 jas aralyǵyndaǵy jastardy memlekettik tapsyrys arqyly mádeniet jáne sport úiirmelerimen qamtamasyz etý jolǵa qoiyldy.
20 sáýirde respýblikalyq biýdjet komissiiasy jergilikti biýdjetten bólinetin sporttyq jáne shyǵarmashylyq tapsyrystyń kólemin maquldady. Sport baǵyty boiynsha 5 mlrd teńgege 40 539 bala men jasóspirimdi qamtý kózdelip otyr. Al mádeniet salasynda 2 mlrd 518 mln teńgege 24 529 bala men jasóspirimdi qamtý kózdelgen», - dedi vitse-ministr.
Degenmen, óńirlerdiń basym bóligi bul sharýany qajetti deńgeide atqarmai otyrǵan kórinedi. Sondyqtan Premer-Ministrdiń orynbasary Eraly Toǵjanov Prezident tapsyrmasyn oryndamaǵa ákim orynbasarlaryn jaýapqa tartý týraly sheshim qabyldapty.
«Óńirler Memleket basshysynyń bul tapsyrmasyn sylbyr oryndap otyr. Úkimet jergilikti atqarýshy organdarǵa balalar men jasóspirimderge arnalǵan memlekettiń tapsyrystyń ishinde sporttyq jáne mádeni tapsyrystardyń úlesin 20 paiyzǵa deiin kóterýdi tapsyrǵan bolatyn. Biraq, ókinishke qarai bul tapsyrma baiaý oryndalyp jatyr.
Úkimet basshysynyń orynbasary Eraly Toǵajnovtyń atyna osy jaittyń bárin baiandap, hat joldaǵan bolatynbyz. Memleket basshysynyń tapsyrmasyn orynlamaǵan ákim orynbasarlaryn jazalaý týraly sheshim shyǵaryldy», - dedi Erlan Qojaqapanov.
Onyń aitýynsha, sport baǵyty boiynsha Túrkistan, Shyǵys Qazaqstan, Aqmola, Qostanai, Qyzylorda jáne Almaty qalalarynda balalar men jasóspirimderdi memlekettik tapsyryspen qamtý deńgeii bir paiyzǵa da jetpeidi. Al mádeniet baǵyty boiynsha Aqtóbe, Shyǵys Qazaqstan, Batys Qazaqstan, Qostanai, Qyzylorda oblystarynda tapsyrystyń úlesi 1 paiyzǵa jetpegen.
