Ishki ister ministrliginde QR Konstitýtsiiasy kúnine arnalǵan saltanatty shara ótti, dep habarlaidy "Ult aqparat".
«Aǵymdaǵy jyly ishki ister organdaryn jańǵyrtý jónindegi 2019-2021 jyldarǵa arnalǵan jol kartasy boiynsha josparlanǵan birqatar mańyzdy is-sharany iske asyrýǵa kiristik. Ata zańnyń jáne Memleket basshysy júrgizip otyrǵan saiasattyń talaptaryna sáikes, eldegi qylmysqa qarsy kúreste IIM-niń barlyq qyzmetteri men bólimsheleriniń jumysyn joǵary deńgeide, jańa formatta uiymdastyryp, qoǵamdyq qaýipsizdikti qamtamasyz etýimiz qajet. Osyǵan bailanysty bizdiń vedomstvo azamattyq qoǵammen, úkimettik emes uiymdarmen jáne buqaralyq aqparat quraldarymen tyǵyz qarym-qatynas ornatyp, belsendi jumystar júrgizýde», - dedi sharada sóz alǵan QR Ishki ister ministri Erlan Turǵymbaev.
Sharada óz mindetterin adal atqarǵan ishki ister organdarynyń birqatar qyzmetkerine QR Konstitýtsiia kúnine orai memlekettik jáne vedomstvolyq nagradalar tapsyryldy.
Atap aitsaq, QR Prezidentiniń arnaiy Jarlyǵymen qyzmettik boryshyn oryndaý kezinde kórsetken erligi men qaisarlyǵy úshin Qaraǵandy oblysy TJD Órt sóndirý jáne apattyq-qutqarý jumystary qyzmetiniń bólim komandirleri Dáýlet Alshymbekov, Talǵat Medeýbaev, jedel kezekshi kómekshisi Darhan Raiymbekov jáne Qaraǵandy oblystyq órt sóndirý bólimi bastyǵynyń mindetin atqarýshy Berik Rahymjanov «Erligi úshin» medalimen nagrattaldy.
Memlekettik marapat ieleri Jalańtas aýyly men «Jas Qanat» balalar lageri janyndaǵy órtti sóndirý kezinde kózge túsken. Olardyń jiti áreketteriń arqasynda júzdegen adam órtten qutqarylyp, egin alqaptary men eldi mekender tilsiz jaýdan meilinshe az zardap shekken bolatyn.
Sondai-aq, ministr Erlan Turǵymbaevtyń buiryǵymen qyzmettik mindetterin úlgili oryndap, jumysynda joǵary nátijelerge qol jetkizgeni úshin ishki ister organdary men Ulttyq ulannyń birqatar qyzmetkerleri marapattaldy.
