QR Premer-Ministri Asqar Mamin balalar kardiologtarynyń, kardiohirýrgtarynyń tapshylyǵyn sheshý úshin ne istelip jatqandyǵyn aitty, dep habarlaidy "Ult aqparat".
«Náreste óliminiń sebepteriniń jalpy qurylymynda jiiligi boiynsha ekinshi oryndy týa bitken damý kemistikteri (úlesi 21,6%) quraidy. Olardyń arasynda júrek-qantamyr júiesiniń kemistikteri (úlesi 44,1%) basym. Qazirgi ýaqytta balalar kardiologtarynyń tapshylyǵy 23, balalar kardiohirýrgtarynyń tapshylyǵy 7, balalar anesteziolog- reanimatologtardyń (perfýziologtardyń) tapshylyǵy 108 birlikti qurap otyr. Bilikti mamandarmen qamtamasyz etý maqsatynda jyl saiyn rezidentýrada klinikalyq mamandyqtar boiynsha kadrlar daiarlaýǵa memlekettik bilim berý tapsyrysy bólinedi. Biyl «Kardiologiia, onyń ishinde balalar kardiologiiasy» mamandyǵy boiynsha 88, «Kardiohirýrgiia, onyń ishinde balalar kardiohirýrgiiasy» mamandyǵy boiynsha 19, «Balalar anesteziologiia – reanimatologiia» mamandyǵy boiynsha 111 túlek oqýyn aiaqtaidy. 2020 jyly «Kardiologiia, onyń ishinde balalar kardiologiiasy» mamandyǵy boiynsha 65, «Kardiohirýrgiia, onyń ishinde balalar kardiohirýrgiiasy» mamandyǵy boiynsha 7 túlek jumysqa ornalastyryldy», - delingen Úkimet basshysynyń senatorlardyń resmi saýalyna berilgen jaýabynda.
Onyń atap ótýinshe, meditsina kadrlaryn yntalandyrý jolymen bilikti mamandarmen qamtamasyz etý úshin júieli sharalar qabyldanýda. Atap aitqanda, meditsina qyzmetkerleriniń jalaqysy kóterilýde. Sondai-aq Memleket basshysynyń tapsyrmasy boiynsha 2023 jylǵa qarai dárigerlerdiń jalaqysyn kezeń-kezeńmen kóterý, onyń ekonomikadaǵy ortasha jalaqyǵa araqatynasyn 2,5 esege deiin jetkizý kózdelgen. Meditsina qyzmetkerleriniń mártebesin arttyrý jáne olardyń qyzmetin kásibi qorǵaýdy qamtamasyz etý boiynsha zańnamalyq is-sharalar qabyldanýda. Aýyldyq eldi mekenderge kelgen jas mamandardy áleýmettik qoldaý qamtamasyz etiledi. Meditsina kadrlaryn daiarlaý jáne olardyń biliktiligin arttyrý júiesi kúsheitilýde.
«Densaýlyq saqtaý salasyn meditsina kadrlarymen qamtamasyz etý máseleleri Úkimettiń otyrysynda qaralyp, ákimdikterge meditsina qyzmetkerlerin materialdyq yntalandyrý boiynsha sharalar qabyldaý týraly tapsyrmalar berildi. Balalarǵa kardiohirýrgiialyq kómekti jetildirý maqsatynda balalar jasyndaǵy patsientterde ókpe gipertenziiasy baǵdarlamasyn júrgizý jáne «Júrektiń jalǵyz qarynshasy bar patsientterge arnalǵan baǵdarlama» mýltipándik komandasyn qurý josparlanýda», - dedi Asqar Mamin.
