Semeide áleýmettik jelide oqýshylardyń sýyq aýa raiynda mektepke kire almai turǵany týraly aqparat tarady. Osyǵan orai qala ákimdigi resmi jaýap berdi, dep habarlaidy QazAqparat.
Búgin WhatsApp messendjerinde jáne áleýmettik jelide oqýshylardyń sýyq aýa raiynda mektepke kire almai turǵany týraly aqparat tarady.
Belgili bolǵandai, sýret Bobrovka kentindegi №44 jalpy orta mektepte túsirilgen.
Alaida qala ákimdigi bul aqparattyń shyndyqqa sáikes kelmeitindigin, balalardyń mektepke esh kedergisiz kirgenin málim etti.
«Bobrovka kentindegi bilim ordasynyń ishki tártip erejesine sai oqýshylar mektepke 07.00-den bastap keledi. 24 qarasha kúni mekteptiń ortalyq esigi ashyq turdy. Kelgen oqýshylar sol esikten kirip jatty. Al bastaýysh synyp oqýshylary mektepke kúndelikti mekteptiń qosalqy esigi arqyly kiretin. Búgin kúnniń sýyqtyǵyna bailanysty, tańerteńgi saǵat 07:20-da qosalqy esik jabyldy. Oqýshylar mektepke ortalyq esikten kirgizildi», - delingen aqparatta.
