Foto: almaty.tv
Qaraǵandy oblysynyń ákimi Ermaǵanbet Bólekpaev eki bala zardap shekken balalar alańyndaǵy tótenshe jaǵdaidan keiin Álihan Bókeihan aýdany ákiminiń orynbasaryn jumystan shyǵarýdy tapsyrdy, dep habarlaidy "Ult aqparat".
Oblys ákimdiginiń aqparatynsha, Álihan Bókeihan aýdany ákiminiń aýlalardy abattandyrýǵa jaýapty orynbasary jumystan shyǵarylady. Sondai-aq qalada qaýipsizdikti kúsheitý úshin abattandyrý erejelerin qaita qaraý kerektigi aityldy.
"Ótken aptada bizde tótenshe jaǵdai boldy. Eresekterdiń nemqurailylyǵynan eki bala zardap shekti. Men barlyǵyna birneshe ret eskerttim jáne taǵy da qaitalaimyn: oiyn alańdaryn jóndegende, eń aldymen qaýipsizdik týraly oilanyńyzdar! Fýtbol qaqpalary men sáýlet nysandaryn tekserip, nyǵaityńyzdar, eshteńe qulap jatpaýy kerek! Merdigerler asyǵystyq tanytyp, tezirek aqsha tapqysy keledi, al keibir áriptesterimiz buǵan kóz jumady", – dedi óńir basshysy apparat keńesinde.
Ol qala ákimine Álihan Bókeihan aýdany ákiminiń orynbasaryn jumystan shyǵarýdy tapsyrdy. Sonymen qatar quqyq qorǵaý organdaryna merdigerdiń jaýapkershiligine quqyqtyq baǵa berýdi surady.
"Mundai nárselerge budan bylai jol berýge bolmaidy. Abattandyrý erejelerin qaýipsizdikti arttyrý baǵytynda qaita qaraýdy tapsyramyn. Mysaly, nege jasandy kógaldyń ornyna tartan jabynyn qoldanbasqa. Munyń bárin zertteý kerek, ózgerister engizý kerek. Bizdiń maqsatymyz – qaýipsiz balalyq shaqty qamtamasyz etý. Bul máselelerdi qysqa merzimde sheshý qajet", - dedi Bólekpaev.
