Balalar ádebieti jyly aiasynda Mádeniet jáne sport ministrligi memlekettik tapsyryspen shyǵarylǵan 40 kitaptyń tusaýyn kesti, dep habarlaidy QazAqparat.
«Ózderińizge belgili, Memleket basshysy Qasym-Jomart Toqaev 2020 jylǵy 22 qazanda ótken QR Prezidenti janyndaǵy Ulttyq qoǵamdyq senim keńesiniń tórtinshi otyrysynda zamana kóshine beiimdelgen sanaly urpaq tárbieleýde balalardyń kitap oqýǵa qyzyǵýshylyǵyn arttyrý jáne qazaqstandyq balalar ádebieti ókilderine qoldaý kórsetý aityldy. Jas jetkinshekterdi álem balalar ádebieti shyǵarmalarymen tanystyrý tapsyrmasyna sáikes, bizdiń ministrlik bastamasymen 2021 jyl «Balalar ádebieti» jyly bolyp bekitilgen bolatyn. Osy ataýly jyl aiasynda ministrlik aýqymdy is-sharalardy júzege asyrdy. Sonyń biri – búgin tusaýy kesilip jatqan 40 balalar kitaby», - dedi QR Mádeniet jáne sport ministri Aqtoty Raiymqulova elordadaǵy QR Ulttyq akademiialyq kitaphanasyndaǵy tusaýkeserde.
Atalǵan basylymdar ministrlik baspa salasynda úilestiretin «Mádeniet jáne óner salasyndaǵy básekelestikti joǵarylatý, qazaqstandyq mádeni murany saqtaý, zerdeleý men nasihattaý jáne jáne muraǵat isin iske asyrý tiimdiligin arttyrý» atty respýblikalyq biýdjettik baǵdarlamanyń «Ádebiettiń áleýmettik mańyzdy túrlerin satyp alý, basyp shyǵarý jáne tartý» atty kishi baǵdarlamasy sheńberinde arnaiy logotippen jáne 120 myń tirajben basylǵan jáne elimizdiń barlyq kitaphanalaryna taratylǵan.
«Basylyp shyqqan ádebietterdiń 34-i – otandyq qalamgerler týyndysy bolsa, altaýy – álem balalar ádebietiniń aýdarmalary. Atap aitqanda, otandyq tanymal avtorlar Aqseleý Seidimbek, Gerold Belger, Nesipbek Aituly, Sháken Kúmisbaiuly, Orazaqyn Asqar, Salyqbai Ábdildábek, Naǵashybek Qapalbekuly, Serik Baiqonov, Serik Qaliuly, Zaria Jumanova jáne basqa da talantty avtorlardyń shyǵarmalary. Aýdarma ádebiet arasynda japon balalar ádebieti de bar, onyń da jas oqyrmandar úshin tyń ári qyzyqty shyǵarma ekenin atap ótýge bolady», - dedi Raiymqulova.
Ministrlik otandyq qalamgerlerdiń ádebietterin shyǵarý boiynsha memlekettik qoldaý tetigin turaqty negizde júzege asyryp otyrady. Joǵaryda atalǵan kishi baǵdarlama aiasynda biyl 168 atalymmen qoǵamdyq mańyzy bar ádebietti jalpy taralymy 492 myń danamen basyp shyǵaryp, respýblikanyń memlekettik kitaphanalaryna tegin taratqan.
Balalar men jasóspirimderge arnalǵan kelesi otandyq shyǵarmalar jaryq kórdi: Q. Ergóbek «Adamnyń bir qyzyǵy bala degen...», A. Raqysheva «Balalyqtyń sońǵy kúzi», B. Qaraǵyzuly «Uly dalanyń ulandary», Sh. Kúmisbaev «Sábi bolǵym keledi», T. Iýpov «Umytpa ulylardyń urpaǵysyń», T. Beisembek «Zerek bala», S. Úsen «Qyrannyń balapany», G. Aqjolova «Aldar kóse», S. Baihonov «Sara apamnyń sabaqtary», A. Seidimbek «Alpamys batyr», Á. Berkimbaeva «Dáýit ataidyń ertegileri», G. Aqjolova «Jańyltpashtar», G. Shoibekova «Tuǵyryl hannyń kók týy», B. Sarybai «Aqtaban», Z. Jumanova «Kúláisha, Rokfeller», N. Qapalbekuly «Balalar álemi», A. Sopybekov «Kóńildi bizdiń kúnimiz», Á. Qaldybaev «Saǵyndym seni, inim!», C. Qaliuly «Quiǵyt káne, tulparym», K. Ybyrai «Shýaq», S. Ospan «Qońyraý», O. Asqar «Aýyl balalary men qala balalary», A. Sársekov «Alaqai!», Á. Faizýllaev «Ótirik aitpaityn kún», O. Baibaquly «Básire», J. Shaǵatai «Aýyldyń kishkentai arheologtary», Sh. Kúmisbaiuly «Babamdai bolǵym keledi», S. Ábdildabek «Aidana men Aqjoltai», A.Ómirbaev «Jas júrek», N. Aqysh «Taý ishindegi taýqymet» qazaq tilderinde , A.Seidimbek «Alpamys», G. Belger «Volk, Chapa i drýgie» orys tilderinde jáne N. Aitulynyń «Saiahatshy shybyn Mýha-neposeda», Iýrii Serebrianskii «Qazaqstandyq ertegiler» qazaq-orys tilderinde shyqty.
Sondai-aq álem balalar ádebieti avtorlarynyń qazaq tilindegi aýdarmalary jaryq kórdi, sonyń ishinde japon balalar ádebieti jas oqyrmandar úshin qyzyqty ári tyń shyǵarma ekenin atap ótýge bolady: Kastriýchin V.A. «Erjúrek qumyrsqa», Stivenson Robert Liýis «Qazyna araly», Daniel Defo «Robinzon Krýzo», Djonatan Svift «Gýlliverdiń saiahattary», «Japon balalar ádebietiniń aýdarmalary» 1-tomy qazaq tilderinde jáne aǵylshyn tilinen aýdarǵan. E. Podrezovoi «Dinozavry» (orys tilinde).
