QR Aqparat jáne qoǵamdyq damý ministri Aida Balaeva XVII Eýraziialyq media forýmda koronavirýs pandemiiasyndaǵy buqaralyq aqparat quraldarynyń róli týraly aityp berdi, dep habarlaidy QazAqparat.
«Pandemiiada aqparattyq keńistik koronavirýspen kúresýdiń mańyzdy quralyna ainaldy. BAQ aldyńǵy qatarda boldy jáne saraptamalyq pikirler taratyp, túrli beinerolikter men arnaiy baǵdarlamalar jasady. Olar memlekettiń strategiiasyn da, qoǵamdyq densaýlyqty saqtaý úshin jeke jaýapkershilikti de túsindirýge baǵyttaldy. Karantin kezindegi BAQ jumysy eki kezeńde júrgizildi. Birinshi kezeńde karantinniń qajettiligin túsindirý mańyzdy boldy, al lokdaýnnyń eń joǵary sátterinde pandemiianyń áserin jeńildetý úshin qabyldanǵan jeke qaýipsizdikten memlekettik qoldaý sharalaryna deiingi dálelder keltirdi. Bizdiń BAQ búkil álem siiaqty tolyǵymen aqparattyq turlaýsyzdyq jaǵdaiynda áreket ete otyryp, bul mindetti oryndai aldy dep oilaimyn. Qazir ótip jatqan ekinshi kezeńdegi basty mindet – jappai vaktsinalaý qajettigi men ujymdyq immýnitetti damytýdyń nátijesi bolyp otyr», - dedi ministr forýmnyń «Pandemiia álemdi qalai ózgertti jáne jahandyq ómir súrýdiń jańa baǵyttaryn qalai anyqtady?» sessiiasynda.
Ministrdiń aitýynsha, búginde Qazaqstan vaktsinalaýdyń 60%-na jetti, bul tek memlekettik apparattyń ǵana emes, júieli uiymdastyrýshylyq jumystyń da nátijesi boldy.
«Munda BAQ róli asyra baǵalandy dep aitý qiyn, óitkeni olardyń «Jaqyndaryńyzdyń ómirin baǵalasańyz, ózińizden bastańyz» degen turaqty jáne progressivti pikiri bar aqparattyq messedjderinsiz, ásirese antivakserlik dúrligýde kópshiliktiń sanasyn oiatý qiyn bolar edi. Óitkeni aqparatty tutynýdyń qarqyndy ósýi adamdardyń naqty paidasy men ziianyn baǵalamai, «aqparattyq fast-fýdty» sińirýge daiyn ekenin kórsetti», - deidi A. Balaeva.
Sondai-aq Aqparat ministri 2020 jyldyń shildesinde arnaiy «Stop Fake» internet-resýrsy qurylǵanyn habarlady. Sait iske qosylǵannan beri 1500-den astam jalǵan aqparat teriske shyǵaryldy, joba kontenti ártúrli platformalarda 15 millionnan astam qaralym jinady.
«Biraq shyn máninde virtýaldy álemde halyqtyń úreii men kúizelisin arttyratyn klikbeit taqyryptar áldeqaida mańyzdy. Dál osy faktor kóptegen konspirolog-blogerler men antivakserlerdiń ne úshin tanymal bolatynyn kórsetedi. Olar kúrdeli maǵynaly konstrýktsiialardy paidalanbaidy, biraq dástúrli BAQ-qa qaraǵanda áldeqaida úlken aýditoriiaǵa ie bolady», - dedi ministr.
Vedomstvo basshysy qazirgi jýrnalisterdi kásibi qaita daiarlaý, sonyń ishinde virtýaldy psihologiia, jýrnalist etikasy, ǵylymi málimetter bazasymen jumys isteý, mem sekildi beineler men aqparat berýdiń basqa da virtýaldy quraldaryn zerdeleý baǵyttary memlekettiń basty mindeti bolýy qajettigin jetkizdi.
«Jýrnalisterdiń bilimi zamanaýi ári tereń bolýy kerek. Bul kásibi jýrnalisterdi áýesqoilardan ereksheleidi. Sondyqtan, biyl bizdiń ministrlik meditsina, ekologiia, din, quqyq, IT máselelerin qamtityn salalyq jýrnalisterdi daiarlaý úshin elimizdiń jetekshi joǵary oqý oryndarymen memorandýmdar jasady. I jartyjyldyqtyń qorytyndysy boiynsha 4000 qatysýshy oqytý kýrstarynan ótti», - dedi Aida Balaeva.
Sonymen birge Aida Balaeva jýrnalister men BAQ qyzmetkerlerine eńbegi men kásibiligi úshin alǵysyn bildirdi.
«Búginde mashinalar álemindegi eń úlken mindetimiz – adam bolyp qalý qabiletimiz bolatyny túsinikti. Pandemiia kezinde meditsina qyzmetkerlerimen, politsiia qyzmetkerlerimen jáne muǵalimdermen birge jýrnalister de COVID-pen kúresýdiń aldyńǵy shebinde júrdi, al keibiri tipti volonterlik qyzmetpen ainalysyp, qajetti zattardy, azyq-túlikterdi tasymaldady», - dedi Aqparat jáne qoǵamdyq damý ministri.
