"Balabaqshalardyń ýaqytyn jumys isteitin ata-analarǵa yńǵailastyrý qajet" - Depýtat

Foto:lucky-child.com

Búgin Májilis otyrysynda depýtat Dáýlet Muqaev balabaqshalardyń ýaqytyn jumys isteitin ata-analarǵa yńǵailastyrýdy surap, depýtattyq saýal joldady, dep habarlaidy Ult.kz. 

Ol keshki saǵat 18.00-ge deiin jumys isteitin ata-analardyń balalaryn 19.00-ge deiin qaraityn kezekshi top jasaqtaý kerek dep sanaidy.

"Mundai tájiribe Astana qalasyndaǵy keibir balabaqshalarda bar. Keshki ýaqyttaǵy kezekshi toptardy elordadaǵy barlyq balaqshada uiymdastyrý kerek dep sanaimyz. Mundai qadam balasyna alańdaǵan ata-analardyń jumysyn jeńildetetin edi. Bizdiń memlekettiń basty qundylyǵy – adam bolsa, onda adamdarymyzǵa yńǵaily jaǵdai qalyptastyra bilýimiz mańyzdy. Bizdińshe, niet bolsa, ynta bolsa, bul máseleni Oqý-aǵartý ministrligi ishki erejeleri arqyly retteýine ábden bolady dep oilaimyz. Sondyqtan ministrden durys sheshim qabyldaýyn suraimyz", -deidi Dáýlet Muqaev.

Depýtat keltirgen statistika boiynsha Astana qalasynda 68 706 balany qamtityn 580 mektepke deiingi uiym jumys isteidi. Onyń 100-i memlekettik balabaqsha bolsa, 477-i jáne 3-i vedomstvolyq bolyp sanalady. Jalpy 2 jastan 6 jasqa deiingi balalardy qamtý deńgeii 81 paiyzdy quraidy. 

Astana qalasynyń bilim basqarmasynyń aqparatynsha, 2030 jylǵa deiin 60 memlekettik balabaqsha salý josparlanǵan. Osyndai keshendi jumystar arqyly balabaqshadaǵy oryn tapshylyǵy máselesin sheshýdi josparlap otyr eken. 

"Rasynda, elordanyń ákimshilik territoriiasy keńeiip, halyq sany jyl saiyn arttyp, sonymen birge áleýmettik infraqurylymdy damytý – balabaqsha, mektep, mádeniet jáne sport keshenderin salý mindeti týyndap tur. Bul – úlken másele. Meniń aitpaǵym, basqa másele. Durysy, astanalyqtardyń talap-tilegi turǵysynda qarastyrǵym keledi", -deidi depýtat.

Elimiz boiynsha memlekettik jáne biýdjettik qyzmette eń kóp jumys isteitin, ol – astanalyqtar ekenin aitqan depýtat Astana qalasyndaǵy memlekettik qyzmet salasynda 4 myńǵa jýyq azamat jumys istese, biýdjettik mekemelerde 100 myńdap sanalatynyn aityp otyr. Olar balasyn balabaqshadan alý úshin kúndelikti jumystan erte ketýge suranady, sóitip qyzmetkerlerdiń jumys ónimdiligi tómendeýi múmkin. 

"Eń qiyny, dál osy ýaqytta elordada jol keptelisi kúsheiip, kólikti tizgindegender balabaqshadaǵy balasyna erterek jetý úshin asyǵys aidaidy. Sonyń saldarynan jol-kólik oqiǵalary oryn alyp jatatyny taǵy anyq", -dep otyr depýtat Muqaev.