Balabaqshaǵa kezekke turǵyzýdy tolyǵymen elektrondy formatqa aýystyrý jumysy jyl sońyna deiin aiaqtalady. Bul týraly búgingi Úkimet otyrysynda QR Bilim jáne ǵylym ministri Erlan Saǵadiev aitty, dep habarlaidy QazAqparat tilshisi.
«Jańa oqý jylynda 900 myńǵa jýyq bala baratyn 10300 mektepke deiingi bilim berý uiymy jumys isteidi. Bul salada memlekettik-jekeshelik áriptestik eń jaqsy damyǵan. Olardyń úlesi balabaqshalardyń 37 paiyzyn quraidy. Bul ótken jylmen salystyrǵanda 6 paiyzǵa artyq. Tek sońǵy alty aidyń ishinde jańa 40 myń oryn ashyldy. Onyń 31 myńy jekemenshik. Nátijesinde 3-6 jastaǵy balalardy balabaqshamen qamtý 93 paiyzǵa jetti», - deidi ministr.
Onyń aitýynsha, «Balapan» baǵdarlamasy arqyly balabaqshadaǵy jalpy oryn sany halyqtyń suranysynan asyp ketken.
«Biraq, bul jalpy respýblika boiynsha aimaqtarda disbalans saqtalyp otyr. Ol aimaqtardaǵy jumys deńgeii men migratsiiaǵa bailanysty. Iri qalalarda, ásirese Almaty men Astana qalalarynda jetispeýshilik bar. Endigi mańyzdy jumys - balabaqshaǵa kezekke turý jáne joldama berýdi tolyǵymen elektrondy formatqa aýystyrý. Sonda kezek jariia túrde jáne tez jyljityn bolady. Bul jumys osy jyldyń aiaǵyna deiin barlyq oblystarda aiaqtalýy tiis», - deidi ol.
Erlan Saǵadiev jańa oqý jylyna daiyndyq barysynda ákimdikterdiń biýdjeti arqyly 99 balabaqshaǵa kúrdeli jóndeý júrgizilip jatqanyn aitady. Onyń 72-i aiaqtalyp qoiǵan. 31 tamyzǵa deiin qalǵan balabaqshalardyń barlyǵyn jóndeý jumystary sońyna jetkizilmek. Jalpy, jergilikti biýdjet qarjysy esebinen kúrdeli jáne aǵymdaǵy jóndeýge balabaqshalarǵa 1 mlrd 300 mln teńge qarajat kózdelgen. Ministrdiń sózine sensek, ákimdikterdiń aqparatyna sáikes, balabaqshalar jańa oqý jylyna daiyn.
