Balabaqshalardy litsenziialaý olardyń jumysyn jaqsartyp, jemqorlyqty azaitady jáne kúrt qysqartýǵa ákelmeidi. Bul týraly Bilim jáne ǵylym salasyndaǵy sapany qamtamasyz etý komitetiniń tóraǵasy Gúlzat Kóbenova Oqý-aǵartý ministrliginiń Facebook paraqshasynda ótken brifingte aitty, dep habarlaidy "Ult aqparat" vedomstvonyń baspasóz qyzmetine silteme jasap.
Ol litsenziialaý kezeń-kezeńimen júrgiziletinin jáne ony engizý 2024 jylǵa josparlanǵanyn atap ótti. Iaǵni bul mektepke deiingi uiymdarǵa jumysty sapa standarttaryna sáikestendirý úshin ýaqyt beriletinin bildiredi.
Litsenziia alý úshin balabaqshalar eń tómengi biliktilik talaptaryna sai bolýy kerek. Áńgime jasalǵan jaǵdaidyń sapasy, kadrlardy irikteý, beinekameralar ornatý, sanitarlyq jáne órt qaýipsizdigi normalaryn saqtaý jáne t.b. týraly bolyp otyr.
«Búgingi tańda mektepke deiingi uiymdardy ashýǵa biryńǵai talaptar joq. Balabaqsha ashqanda qandai jaǵdai jasalǵanyn, kimdi jumysqa alady, materialdyq-tehnikalyq jabdyqtalýy qandai ekenin eshkim teksermeidi. Keibir jekemenshik balabaqshalar tipti ashylǵany týraly da habarlamaidy. Balabaqshalardy litsenziialaý 2011 jyly toqtatylǵan bolatyn. Ol kezde bul balalardy mektepke deiingi tárbiemen qamtýdy arttyrýǵa múmkindik berdi. Búgingi kúni biz balabaqshamen 100 paiyzǵa deiin qamtýǵa qol jetkizdik. Elimizde 11 myńǵa jýyq mektepke deiingi uiym jumys isteidi, onyń 5 myńnan astamy - jekemenshik. Endi biz sapa máselesin birinshi orynǵa qoiyp otyrmyz. Eshkim balabaqsha sanyn qysqartýdy maqsat etip otyrǵan joq. Ministrlikke ata-analardan aryz-shaǵymdar túsip jatyr. Eger balabaqshanyń jumysy talapqa sai bolsa, onda ol esh qiyndyqsyz litsenziia alady. Al eger sáikessizdikter bolsa, olardy joiý qajet. Mine bar-joǵy osy. Ministrlik 2024 jyldan bastap kezeń-kezeńimen litsenziialaýdy engizedi. Balabaqshadaǵy jumysy sapaly júrip jatqan kásipkerlerge qorqatyn eshteńe joq. Qalypty, talapqa sai jumys istep júrgen balabaqshalar litsenziialaýdan qoryqpaitynyn erekshe atap ótkim keledi. Rásim tolyǵymen avtomattandyrylyp, turaqty túrde jumys isteidi», - dedi Bilim jáne ǵylym salasyndaǵy sapany qamtamasyz etý komitetiniń tóraǵasy Gúlzat Kóbenova.
Birinshi kezeńde endi ashylyp jatqan mektepke deiingi uiymdar litsenziia alady. Bul jylyna shamamen 200-dei balabaqsha.
Kelesi kezeńde – qaita memlekettik attestatsiiadan óte almaǵan mektepke deiingi uiymdar (jylyna 10-15 balabaqsha). Sodan keiin táýekeldi baǵalaý dárejesine bailanysty qalǵan barlyq jumys istep turǵan balabaqsha ótedi.
Balabaqshalardy litsenziialaý kóptegen elde qoldanylady. Olardyń arasynda Germaniia, Aýstraliia, Kanada, Koreia, Malaiziia, Singapýr, Resei jáne t.b. bar.
Mysaly, Germaniiada, Aýstraliiada jáne Kanadada balalardyń jaǵdaiyna qaýip tónse nemese uiymnyń jumysy sapa standarttaryna sáikes kelmese, onda litsenziia qaitaryp alynýy múmkin.
Jeke kásipkerler de, balalar múddesi basymdyqqa ie jeke bilim berý uiymdarynyń birlestikteri de balabaqshalardy litsenziialaýdy qoldap otyrǵanyn eskerte keteiik. Kásipker Dinara Qudaiqulova balabaqshalardyń qyzmeti rettelmegenin aityp otyr.
«Balabaqshalardyń 93%-y memlekettik tapsyrys (memlekettik qarjylandyrý) alady. Balabaqshanyń iesi retinde balalardy oqytyp jatyrmyz ba, qalai oqytamyz, olardy qalai tamaqtandyramyzdy eshkim bilmeitinin aita alamyn. Ata-analar bizge senedi, biraq baqylaý joq. Buǵan 10 jyl boiy barlyǵy boi úiretip alǵan. Biraq onyń saldaryn kórip otyrmyz. Al qazir eshkim baqylaý júrgizilgenin qalamaidy. Olardyń qatarynda men de barmyn. Eger aqylǵa salyp qaraityn bolsaq, men úsh balanyń anasymyn. Búgin men balabaqsha jumysymen ainalysyp otyrmyn, biraq erteń mundai jumys istemeýim múmkin. Al nemerelerim qandai balabaqshaǵa barady? Balalar jylynda keler urpaqtyń bolashaǵyn oilaýymyz kerek. Vaýcherge keletin bolsaq. Nege balabaqsha quryltaishylary ata-analardy aqymaq kóredi? Nelikten keibireýler ata-analar óz qaltasynan tólei almaidy dep oilaidy. Nege olar ata-analarǵa aqsha bergisi kelmeidi? Biz onlain nesie alamyz, kommýnaldyq tólemderdi, aiyppuldardy jáne t.b. tóleimiz. Balabaqshalardyń quryltaishylary ata-analar vaýcher júiesin paidalana almaidy dep oilai ma? Bul qarjyny bólýdiń ashyqtyǵy», - deidi «Ádilet» respýblikalyq mektepke deiingi jáne orta bilim berý qaýymdastyǵynyń tóraǵasy Dinara Qudaiqulova.
