Sybailas jemqorlyq áleýmettik-ekonomikalyq damý úderisin, naryqtyq ekonomikanyń qurylýyn, investitsiialar tartý protsesin tejeidi. Demokratiialyq memlekettiń saiasi jáne qoǵamdyq institýttaryna keri áserin tigizedi, eldiń bolashaq damýyna qaýip tóndiredi. Qazaqstannyń memlekettik saiasatynyń negizgi basymdyqtarynyń biri sybailas jemqorlyqpen kúres bolyp tabylady.
Para degenimiz ne? Bul laýazymdy tulǵanyń basqa bir tulǵadan laýazymyna qatysty kórsetetin qandai da bir qyzmet túrine beriletin aqsha nemese ózge zatty alýy. Para dep sanalatyn nárseler: aqsha, onyń ishinde, valiýta, bank túbirtekteri men qundy qaǵazdar, baǵaly metaldar men asyl tastardan jasalǵan buiymdar, avtokólikter, páterler, saiajailar men qala syrtyndaǵy úiler, azyq-túlikter, turmystyq tehnika men aspaptar, ózge taýarlar, jer ýchaskeleri jáne ózge jyljymaityn múlik. Sondai-aq, emdelý, jóndeý jáne qurylys jumystary, sanatorlyq jáne týristik joldamalar, sheteldik sapar, oiyn-saýyqtar men basqa shyǵyndardy óteýsiz nemese tómen baǵamen tóleý de paraǵa jatýy múmkin.
Adamdardyń kóbi para berý men sybailastyqty qandai jaǵdai bolsa da ózderi úshin paidaly nemese ziiany joq qubylys retinde qarastyrady. Sońynda bul tek bári úshin jaman ǵana emes, ár adam úshin qaýipti. Óitkeni zań biligi ádil bolmasa, ol kez kelgen adamdy búldirýi múmkin.
Jete túsinip kórýge tyrysaiyq. Barlyǵymyz da ártúrli salyq tóleimiz. Alaida tabystyń bir bóligin memleketke bere otyryp, biz onyń áleýmettik qyzmetti júzege asyrýyn qamtamasyz etetindigin eskeremiz: tegin bilim alý, densaýlyq saqtaý, infraqurylymdy qurý, qaýipsizdikti qamtamasyz etý.
Bizdiń balabaqsha ujymynda jemqorlyqty boldyrmaý jáne onyń aldyn alý boiynsha qyzmetkerlermen jinalys, pikirtalas, dáris ótkizilip turady. Sharalarda arnaiy daiyndalǵan beineúzindiler kórsetilip, býklet taratylyp, saýalnama júrgiziledi. Saýalnama arqyly sybailas jemqorlyqqa itermeleitin negizgi sebepter anyqtalady.
Sybailas jemqorlyqpen kúresý bir nemese birneshe organnyń mindeti dep qabyldasaq, qatelesemiz. Memleket pen qoǵamnyń kúsh-jigerin biriktirgende ǵana osy qubylysqa qarsy kúres júrgize alamyz. Sybailas jemqorlyq memlekettiń bedeline nuqsan keltiretin dert ekendigin jete túsinýimiz qajet.
Farida QALDYBEKOVA,
«Baldáýren» balabaqshasynyń nusqaýshysy
Almaty oblysy
