Foto: Almaty.tv
Mańǵystaý oblysynda balabaqsha tóńireginde daý týyp, oqiǵaǵa bailanysty tekseris bastaldy. Áleýmettik jelide Qaraqiia aýdanyna qarasty Jetibai aýylyndaǵy «Jaýqazyn» balabaqshasynda túsirilgen video taraǵannan keiin, politsiia mán-jaidy anyqtaýǵa kiristi, dep habarlaidy Ult.kz Lada.kz basylymyna silteme jasap.
Quqyq qorǵaý organdarynyń málimetinshe, videodaǵy 6 jasar bala atalǵan balabaqshanyń tárbielenýshisi emes. Ol sol kúni anasynyń jumys ornynda bolǵan.
«Oqiǵaǵa bailanysty balanyń anasyna qatysty tárbieleý mindetterin tiisinshe oryndamaý faktisi boiynsha ákimshilik is qozǵaldy», – dep habarlady politsiia.
Sonymen qatar, balabaqsha qyzmetine qatysty da tekseris júrgizý úshin ýákiletti organdarǵa usynys joldanǵan. Vedomstvo málimetinshe, oqiǵa saldarynan zardap shekkender joq.
Buǵan deiin ata-analardyń biri balanyń agressivti minez-qulqyna shaǵymdanǵan. Onyń aitýynsha, bala toptar arasynda erkin júrip, ózge balalarǵa tiisip, uryp-soǵyp, qorqytyp júrgen. Sondai-aq áiel onyń mekeme basshysynyń uly ekenin alǵa tartqan.
Ótinish iesi jaǵdaidy videoǵa túsirmek bolǵanymen, balabaqsha aýmaǵynda túsirilim jasaýǵa tyiym salynǵany sebepti oǵan ruqsat berilmegen. Al ýchaskelik inspektor beinebaqylaý jazbalaryna tek resmi ótinish negizinde ǵana qol jetkizýge bolatynyn túsindirgen.
Mańǵystaý oblystyq bilim basqarmasy bul jaǵdaidan habardar ekenin málimdedi. Resmi aqparatqa sáikes, 20 sáýirden bastap arnaiy jumys toby qurylyp, qyzmettik tekseris bastalady.
