Almaty oblysyndaǵy Ile aýdanynyń Baiserke aýylyndaǵy «Niet-ai» jeke menshik balabaqshasynda tárbielenýshilerge qol kótergen maman joǵalyp ketti. Balalarǵa qatygezdik tanytqan tárbieshiniń áreketi áleýmettik jelige taraǵannan keiin ol jumysqa kelmei, uialy telefonyna da jaýap bermei jatyr, dep habarlaidy QazAqparat.
«Balalarǵa qatygezdik tanytqan maman 5 tamyzda atalǵan jeke menshik balabaqshaǵa tárbieshiniń kómekshisi bolyp jumysqa ornalasqan. Oǵan óziniń múmkindikterin kórsetý úshin bir ai synaq merzimi berilgen. Al 13 tamyzda Ekaterina esimdi ana eki balasyn osy balabaqshaǵa alǵash ornalastyrǵan. Dál sol kúni tárbieshi jańadan kelgen balaǵa qol kótergen. Bólmedegi baqylaý kameralaryndaǵy jazbalar qaralyp, mán-jai anyqtalǵannan keiin jańadan ornalasqan maman keshirim suraǵan. Biraq onyń áreketi áleýmettik jelige tarap ketkennen keiin tárbieshi jumysqa kelmei, uialy telefonyna jaýap bermei jatyr. Qazir Ile aýdandyq bilim bólimi balalardy urǵan tárbieshini jumystan shyǵarý jóninde balabaqshaǵa usynys jiberdi. Al balalardyń ata-anasy prokýratýraǵa aryz túsirdi. Naqty qandai sheshim qabyldanatynyn osy quzyrly organ sheshedi», - Ile aýdany ákiminiń baspasóz hatshysy Baqtiiar Talǵatuly.
Esterińizge sala keteiik, áleýmettik jelide balany urǵan tárbieshiniń videosy jariialanǵanyn habarlaǵan bolatynbyz. Beinejazbada belgisiz áiel uiyqtap jatqan balany mazalap, beti men jambas tusynan urǵany anyq kórinedi. Artynsha, ata-ana balabaqshada búldirshindi urǵan tárbieshiniń ústinen politsiiaǵa aryz túsirdi.
«Balanyń ata-anasy Ile aýdandyq politsiiasyna tárbieshiniń ústinen aryz túsirdi. Tártip saqshylar qajetti saraptamany taǵaiyndady. Soǵan sáikes, protsessýaldyq sheshim qabyldanatyn bolady», - delingen atalǵan vedomstvonyń taratqan aqparatynda.
Aita keteiik, shilde aiynda Taldyqorǵandaǵy jeke menshik balabaqshada osyǵan uqsas jaǵdai bolǵan. Búldirshinderge qol kótergen tárbieshiniń ústinen QR QK 141-babyna sáikes qylmystyq tergeý bastaldy.
