QR Bilim jáne ǵylym ministrligi tótenshe jaǵdai rejiminen keiin balabaqshalar qalai jumys isteitin málim etti, dep habarlaidy "Ult aqparat" vedomstvonyń baspasóz qyzmetine silteme jasap.
«COVID-19 infektsiiasynyń ósý deńgeii jeti kún ishinde 7%-dan aspaǵan jaǵdaida mektepke deiingi uiymdar sanitarlyq qaýipsizdik sharalaryn saqtai otyryp jumysyn bastaidy. QR Bilim jáne ǵylym minitrligi jumys algoritmin ázirlep, aimaqtyq bilim basqarmalaryna jiberdi. Mektepke deiingi uiymdar jumysyn bastaý týraly sheshimdi jergilikti bilim basqarmalary jáne bilim bólimderi ózderi qabyldaidy.
Balalar men qyzmetkerlerge qaýipsiz jaǵdaidy jasaýǵa, olardyń ómiri men densaýlyǵyn saqtaýǵa basshysy jaýapty», delingen habarlamada.
Balabaqshalarǵa birinshi kezekte ata-analary jumysqa baratyn jáne úide jalǵyz qala almaityn balalar qabyldanady. Sodan keiin ata-analardyń qalaýy boiynsha keletin balalardy qabyldaidy.
«Ata-ana balasyn balabaqshaǵa ákelgisi kelse, tárbieshilerge aitýy kerek. Tárbieshi basshysyna balabaqshaǵa kelgisi keletin búldirshinderdiń sanyn habarlaidy. Basshylyq kún saiyn birdei jastaǵy nemese ártúrli jastaǵy balalardyń toptaryn quraidy. Ár topta bala sany 15-ten aspaýy kerek.
Bala sanyna bailanysty jumysqa shyǵatyn qyzmetkerler tizimi jasalyp, kún saiyn túzetilip otyrady.
Ákimshilik ata-analarǵa balanyń balabaqshaǵa kelý máselesi boiynsha túsindirý jumystaryn júrgizýi kerek (jumys rejimi, jas toptary, densaýlyq jaǵdaiy, tiisti kiim, kún tártibin saqtaý jáne t.b.)», delingen habarlamada.
Búldirshinderdi tárbieshi men meditsina qyzmetkeri qabyldaidy, balalardyń terisin qarap, temperatýrasyn ólsheidi.
«Balabaqshada 3 kúnnen artyq bolmaǵan jaǵdaida, ýchaskelik pediatrdan densaýlyq jaǵdaiy týraly anyqtama usynylýy tiis.
Sondai-aq, kún saiyn tańerteń meditsina qyzmetkeri balabaqshanyń barlyq qyzmetkerin tekserip otyrady. Meditsina qyzmetkeri kúnine eki ret toptardy aralap, balalardyń jaǵdaiyn baqylap otyrady.
Usynylatyn jumys ýaqyty - saǵat 9.00-den 18.00-ge deiin», delingen habarlamada.
