Qaraǵandyda búldirshinge qatygezdik kórsetken balabaqsha tárbieshisi jumystan qýyldy. Mekemeniń direktory men ádiskerine pedagogtardyń qyzmetine baqylaý júrgizbegeni úshin sógis jariialandy. Osy derek boiynsha materialdar quqyq qorǵaý organdaryna berildi, - dep habarlaidy kaz.tengrinews.kz tilshisi Qaraǵandy qalalyq bilim bólimine silteme jasap.
Búldirshindi uryp-soǵý oqiǵasy túsirilgen video Instagram jelisinde Denisa Denski degen blogerdiń paraqshasynda jariialandy. Videony birneshe saǵattyń ishinde 10 myń adam qaraǵan.
Videonyń kadrlarynan mektep jasyna deiingi balalardyń oryndyqta otyrǵanyn kórýge bolady. Olardyń mańynda tárbieshi otyr. Pedagog balalardyń qoldaryn tekserip jatady da, bir balany qulaǵynan tartyp, tartyp qalady. Balany tizerletip otyrǵyzǵan áiel ony birde tunshyqtyryp, birde shymshyp alady. Sosyn ony qasyndaǵy oryndyqqa otyrǵyzady.
Qalalyq bilim bólimindegiler oqiǵaǵa qatysty pikir bildirdi. Resmi málimet boiynsha, bul video "Balaqai" balabaqshasynda túsirilgen. Videodaǵy tárbieshi jumysyn jalǵastyrýǵa jatpaityn adamgershilikke jat qylyq kórsetkeni úshin jumystan shyǵarylǵan. Ol bul mekemede 7 jyldai ýaqyt jumys istegen.
"Bilim bólimi "Balaqai" balabaqshasynyń tárbieshisiniń balalarǵa qatysty qatygezdik kórsetý deregi boiynsha bylai dep túsinik beredi: ata-analardyń shaǵymynan keiin balabaqsha direktory ishki qyzmettik tekseris júrgizdi, naqty aitqanda videobaqylaý kamersyna túsirilgen kadrlar qaraldy, tárbieshiden túsinikteme alyndy, ata-analar jinalysy ótkizildi. Ókinishke qarai, bul derek rastaldy. Videomaterialdar ata-analarǵa berildi. 2017 jyldyń 24 mamyrynda tárbieshi adamgershilikke jat qylyq jasaǵany úshin 52-baptyń 14-bóligi boiynsha jumystan shyǵaryldy", - dep habarlady vedomstvodaǵylar.
Bilim bólimindegiler ádisker men direktordyń da jazalanǵanyn habarlady. Olarǵa qatań sógis jariialanypty. Endi bul ispen quqyq qorǵaý organdary ainalysady. Balabaqsha direktory osy derek boiynsha materialdardy politsiiaǵa berdi.
