Atyraýdaǵy sábi óliminen keiin respýblika boiynsha derekter men meditsinalyq kartalarǵa jappai aýdit júrgizililgen. Bul týraly QR Densaýlyq saqtaý ministri Eljan Birtanov aitty, dep habarlaidy "Ult aqparat".
«Densaýlyq saqtaý - elimizdiń negizgi basymdyqtarynyń biri. Qarqyndy jumys pen keshendi tásilderdiń arqasynda jalpy sońǵy bes jylda ana, týberkýlezden bolatyn ólimniń, qan ainalym júiesi aýrýynan bolatyn, onkologiia jáne jaraqattan bolatyn ólimniń tómendegeni baiqalady. Alaida uzaq merzimdi kezeńde osy jyldyń 8 aiynyń derekteri boiynsha jalpy ólimniń jáne náreste óliminiń ósýinde bolmashy aýytqýlar baiqalady», - dedi ministr Parlament Senatynda.
Eljan Birtanovtyń aitýynsha, ólim sebepteri boiynsha júieli sharalar tsifrlandyrý men statistikalyq derekterdiń sapasyn jaqsartý arqyly belsendi túrde júrgizilýde.
«Biz Atyraý oblysynda barlyq týǵannan keiin shetinep ketken nárestelerdiń shyny preparattarynan alynǵan obektivti derekter men meditsinalyq kartalardyń aýditinen keiin el boiynsha jappai aýdit júrgizdik. Taldaý nátijesinde esepke alynbaǵan erte neonataldyq ólim-jitimniń (...) 277 náreste ólimin jasyryp qalý faktilerin anyqtadyq. Osyǵan bailanysty 2018 jyly náreste óliminiń kórsetkishine túzetý júrgizildi. Burynǵy 1000 tiri týǵan náreste boiynsha ólim-jitim kórsetkishi 8,03-ten 8,7-ge ózgergen», - dedi ol.
